Монгол Улсын экспорт, тээвэр ложистикийн салбарт түүхэн ач холбогдолтой Гашуунсухайт–Ганцмод боомтын хил дамнасан төмөр замын барилгын ажил эхлэхээр боллоо. “Тавантолгой төмөр зам” ХХК болон “Хятадын төмөр замын барилгын гүүрийн инженерийн товчоо групп” ХХК барилгын ажил гүйцэтгэх гэрээний төслийг эцэслэн тохирч, албан ёсоор гарын үсэг зуржээ.

Гарын үсэг зурах ёслолд Монголын талаас Зам, тээврийн сайд Б.Дэлгэрсайхан тэргүүтэй холбогдох албаны төлөөлөл, Хятадын талаас Элчин сайд Шэнь Минжуан болон инженеринг компанийн удирдлагууд оролцсон байна. Энэхүү төсөл нь Монгол, Хятадын Засгийн газар хоорондын хамтын ажиллагааны хэлэлцээрийн хүрээнд 2024 оны хоёрдугаар сард Харбин хотноо байгуулагдсан гэрээний үндсэн дээр хэрэгжиж байгаа юм.

Төмөр замын техникийн үзүүлэлтүүд:

• Урт: 32.6 км, үүнээс гол зам нь 19.5 км

• Замын төрөл: нэгдүгээр зэрэглэлийн өргөн (1520 мм) болон нарийн (1435 мм) царигийн хос зам

• Гүүрэн байгууламж: 8–31 метр өндөр, дан болон хос замтай

• Ачаа тээвэрлэх хүчин чадал:

  • Өргөн царигаар жилд 30 сая тонн

  • Нарийн царигаар жилд 10 сая тонн

Барилгын ажлыг 24 сарын хугацаанд дуусгах төлөвлөгөөтэй бөгөөд энэ сарын 15-нд анхны шонг өрөмдөж, гүүрийн бүтээн байгуулалтыг албан ёсоор эхлүүлэх юм. Төслийг гүйцэтгэгчээр Төрийн худалдан авах ажиллагааны хууль тогтоомжийн дагуу сонгон шалгаруулалт зохион байгуулж, дэлхийд томоохонд тооцогдох “Хятадын төмөр замын барилгын корпораци” (CRCC) шалгарч, охин компани болох “Гүүрийн инженерийн товчоо групп” барилгын ажлыг гүйцэтгэхээр болжээ.

Эдийн засагт үзүүлэх нөлөө:

• Нүүрсний экспортын хэмжээ 83 сая тонноос 165 сая тоннд хүрнэ

• Жилийн экспортын орлого 1.5 тэрбум ам.доллароор нэмэгдэнэ

• Монгол Улсын нэг хүнд ногдох ДНБ 10 мянган ам.долларт хүрэхэд нөлөөлнө

• Тээврийн зардал 2–2.5 дахин багасна

• Экспортын гарц 30 сая тонноор, тээврийн орлого 300 сая ам.доллароор өснө

• Байнгын 200, түр хугацааны 800 ажлын байр шинээр бий болно

Уг төсөл нь зөвхөн Гашуунсухайт–Ганцмод боомтыг холбохоос гадна цаашид Шивээхүрэн–Сэхээ, Бичигт–Зүүнхатавч, Ханги–Мандал зэрэг бусад хилийн боомтуудыг төмөр замаар холбох суурь нөхцөлийг бүрдүүлнэ. Мөн нүүрс худалдах, худалдан авах урт хугацааны гэрээ байгуулах, уурхайн хүчин чадлыг нэмэгдүүлэх зэрэг өргөн хүрээтэй хамтын ажиллагаа хэрэгжих юм.

Энэхүү бүтээн байгуулалт нь Монгол, Хятад хоёр улсын хувьд 1955 оноос хойш 70 жилийн дараа хоёр дахь боомтыг төмөр замаар холбож буй түүхэн үйл явдал болж байна.

Эх сурвалж: Зам, тээврийн хөгжлийн яам, Тавантолгой төмөр зам ХХК,