Монгол Ардын Намын Удирдах зөвлөл хуралдаж, Монгол Улсын дараагийн Ерөнхий сайдад хэнийг нэр дэвшүүлэх талаар хэлэлцжээ. Хуралдаанаар тус намын Удирдах зөвлөлийн 100 хувийн саналаар Гомбожавын Занданшатарыг Монгол Улсын 33 дахь Ерөнхий сайдад нэр дэвшүүлэхийг дэмжсэн байна. Үүний зэрэгцээ түүнийг МАН-ын даргад нэр дэвшүүлэхээр тогтжээ. Гэхдээ эцсийн шийдвэрийг МАН-ын Бага хурлын гишүүдийн олонх гаргах юм.

Г.Занданшатар нь Монголын улс төрийн дээд түвшинд тогтвортой байр суурь эзэлсэн, улс төр, санхүү, хууль тогтоох салбарт арвин туршлагатай нэгэн юм. Тэрээр Баянхонгор аймгийн Баацагаан суманд 1970 онд төрсөн бөгөөд ОХУ-д эдийн засгийн чиглэлээр дээд боловсрол эзэмшсэн. АНУ, БНЭУ, БНСУ зэрэг оронд бизнес, удирдлагын чиглэлээр мэргэшиж, эдийн засгийн ухааны магистр цол хүртсэн.

Түүний ажлын гараа боловсрол, банк санхүүгийн салбарт эхэлсэн бөгөөд ХААН банкны дэд захирал, Монголбанкны төлөөлөгчөөр ажиллаж байсан. 2004 оноос хойш дөрвөн удаа УИХ-ын гишүүнээр сонгогдсон бөгөөд энэ хугацаанд УИХ-ын Төсвийн зарлагын дэд хорооны дарга, Гадаад харилцааны сайд, Засгийн газрын Хэрэг эрхлэх газрын дарга, УИХ-ын дарга зэрэг хариуцлагатай албан тушаал хашжээ. Тэрбээр мөн Стэнфордын их сургуульд судлаач багшийн үүрэг гүйцэтгэж байсан.

Улс төрийн хувьд тэрээр 1998 онд МАХН-д элсэж, 2012-2013 онд МАН-ын Ерөнхий нарийн бичгийн даргаар ажилласан. Мөн 30 гаруй томоохон хууль санаачилж батлуулсан нь түүнийг хууль тогтоох, бодлогын шинэчлэл хийхэд идэвхтэй оролцогч болохыг харуулдаг. Түүний санаачилсан хуулиуд нь зөвлөлдөх ардчилал, татвар, хяналт шалгалт, үндсэн хуульт ардчиллын асуудалд чиглэж байжээ.

Түүний хүлээн авсан цол, шагналууд дотроос “Сүхбаатарын одон” (2022), “Алтан гадас” одон (2005), “Банк санхүүгийн тэргүүний ажилтан” цол тэмдэг (1999), Украйны Цэцэн Ярославын одон, III зэрэг зэрэг олон улсын болон дотоодын үнэлгээтэй шагналууд багтдаг.

Хөрөнгө орлогын мэдүүлгийн хувьд Г.Занданшатар 1.1 тэрбум төгрөгийн үл хөдлөх хөрөнгө, 84 сая төгрөгийн жилийн орлого, 80 сая төгрөгийн үнэтэй авто машин, 130 сая төгрөгийн үнэт зүйл, 286 сая төгрөгийн хадгаламжтай хэмээн мэдүүлжээ.

МАН-ын Бага хурал ойрын хугацаанд хуралдаж, түүнийг Ерөнхий сайдын албан тушаалд нэр дэвшүүлэх эсэхийг батламжлах юм.