Өнөөдөр буюу 2025 оны зургадугаар сарын 9-ний өдөр Улсын Их Хурлын байнгын хороод болон ажлын хэсгүүдийн таван хуралдаан “Үндсэн хууль”, “Их засаг”, “Жанжин Д.Сүхбаатар” танхимуудад болох тов гарчээ.
Ажлын хэсгийн хуралдаанууд дараах байдлаар явагдана:
-
10:00 цагт, Хууль зүйн байнгын хорооны дэргэд Эрүү шүүлт тулгасан гэмт хэргийн хохирогчдод үзүүлэх тусламж, нөхөн төлбөрийн асуудлаар хуулийн төсөл боловсруулах үүрэгтэй ажлын хэсэг “Үндсэн хууль” танхимд хуралдана.
-
12:00 цагт, Байгаль орчин, хүнс, хөдөө аж ахуйн байнгын хорооны ажлын хэсэг Монгол адууны удмын санг хамгаалах, “Малын генетик нөөцийн тухай” хуулийн хэрэгжилтийг хэлэлцэхээр мөн “Үндсэн хууль” танхимд хуралдана.
-
14:00 цагт, Төрийн байгуулалтын байнгын хорооны ажлын хэсэг “Улаанбаатар хотын 2040 он хүртэлх хөгжлийн ерөнхий төлөвлөгөө”-ний хэлэлцүүлэгт бэлтгэхээр “Их засаг” танхимд цуглана.
-
16:00 цагт, хоёр хуралдаан давхцан явагдах бөгөөд Аж үйлдвэржилтийн бодлогын байнгын хороо хил орчмын худалдаа, бүс нутгийн хамтын ажиллагааны талаарх хууль тогтоомжийн хэрэгжилтэд хяналт тавих асуудлыг хэлэлцэх бол, УИХ-ын даргын захирамжаар байгуулагдсан ажлын хэсэг 2007 оны 27 дугаар тогтоолын хэрэгжилтийг хэлэлцэнэ. Эхний хурал “Их засаг”, хоёр дахь нь “Үндсэн хууль” танхимд тус тус болно.
Мөн 10:00 цагт, Байгаль орчин, хүнс, хөдөө аж ахуйн байнгын хороо “Жанжин Д.Сүхбаатар” танхимд хуралдаж, “Байгаль орчинд нөлөөлөх байдлын үнэлгээний тухай хууль”-д нэмэлт, өөрчлөлт оруулах тухай хуулийн төслийг хэлэлцүүлэх ажлын хэсэг байгуулах тухай тогтоолын төслийг хэлэлцэхээр төлөвлөжээ.
Эх сурвалж: Улсын Их Хурлын Тамгын газар
