Монгол Улсын Ерөнхийлөгч У.Хүрэлсүхийн Бүгд Найрамдах Чех Улсад хийсэн төрийн айлчлалын үр дүнд хоёр улс Иж бүрэн түншлэлийн харилцаа тогтоож, хамтын ажиллагааны баримт бичигт гарын үсэг зурсан. Энэ түүхэн айлчлалын бодит үр дүнгийн нэг нь “Чех вилладом” хэмээх орон сууцны төсөл болж байна.

Тус төсөл нь Чехийн хөрөнгө оруулалтаар Улаанбаатар хотын Сонгинохайрхан дүүргийн 34 дүгээр хорооны нутаг дэвсгэрт хоёр га талбайд хэрэгжиж байгаа бөгөөд нийт 40 айлын орон сууц барихаар төлөвлөжээ. Баригдах орон сууц нь европ стандарт, чехийн дэвшилтэт технологи, инновац, ухаалаг шийдлүүдийг хослуулсан байх бөгөөд сэргээгдэх эрчим хүч ашиглах, дулаан алдагдлыг бууруулах ухаалаг систем, мөн найман балл хүртэлх газар хөдлөлтөд тэсвэртэй бүтэцтэй байх аж.

Үүнээс гадна Монгол Улсын Ерөнхийлөгчийн санаачилсан “Тэрбум мод” үндэсний хөдөлгөөнийг дэмжин 3500 мод тарих ажлыг хамтад нь хэрэгжүүлэхээр төлөвлөсөн байна.

Төслийн нээлтийн үеэр албаны төлөөлөгчид хоёр орны Ерөнхийлөгчийн ярилцаж тохирсон бодлого бодит ажил болон хэрэгжиж эхэлж буйг онцолж, энэ нь цаашдын харилцан ашигтай хамтын ажиллагаанд үлгэр болохуйц бүтээн байгуулалт болж байгааг тэмдэглэлээ.

Төслийг Чехийн хөрөнгө оруулалттай “ЧМ блью лайнес” компани хэрэгжүүлж байгаа бөгөөд тус компанийн өмнөх туршлага нь ч бас үлгэр дуурайлтай. Тухайлбал, Чехийн “Finep” компани Орхон аймагт “Эрдэнэт үйлдвэр”-ийн ажилчдад зориулж 1000 айлын орон сууц барих 30 сая ам.долларын хөрөнгө оруулалтыг хийж байжээ.

Нээлтийн үйл ажиллагаанд УИХ-ын гишүүн, Төрийн байгуулалтын байнгын хорооны дарга Ж.Бат-Эрдэнэ, БНЧУ-аас Монгол Улсад суугаа Элчин сайд Ян Вытопил, Ерөнхийлөгчийн гадаад бодлогын зөвлөх Э.Одбаяр, нийслэлийн ерөнхий архитектор Ч.Төгсдэлгэр болон бусад холбогдох албаны хүмүүс оролцсон байна.

Эх сурвалж: Гадаад харилцааны яам, Монгол Улсын Ерөнхийлөгчийн Тамгын газар