Гадаад харилцааны сайдын үүрэг гүйцэтгэгч Б.Батцэцэг Оманы Султант Улсаас Монгол Улсад Бээжин хотоос хавсран суугаа Элчин сайд Нассер Аль-Бусайдиг өнөөдөр Гадаад харилцааны яаманд хүлээн авч уулзлаа.
Уулзалтын эхэнд Б.Батцэцэг Монгол Улсын санаачилгаар зохион байгуулагдаж буй Зүүн хойд Азийн аюулгүй байдлын асуудлаарх “Улаанбаатарын яриа хэлэлцээ” олон улсын бага хуралд анх удаа оролцож буйд нь талархал илэрхийлж, бүс нутгийн энх тайван, яриа хэлэлцээг дэмжигч бодлогын хүрээнд Оман Улсын идэвхтэй оролцоо чухал ач холбогдолтойг онцлон дурдав. Мөн тэрбээр Гадаад харилцааны сайдын түвшинд хийсэн албан ёсны айлчлал амжилттай болж, хоёр улсын харилцаанд шинэ шат тавьсанд сэтгэл хангалуун байгаагаа тэмдэглэв.
Элчин сайд Нассер Аль-Бусайди Оманы Гадаад хэргийн сайд Бадр Аль-Бусайдигийн мэндчилгээг уламжилж, хоёр орны сүүлийн хоёр жилийн харилцаа бодит үр дүнтэй, эрчимтэй хөгжиж буйг сайшаалаа. Тэрбээр цаашид эдийн засаг, хөрөнгө оруулалт, хамтарсан төсөл хөтөлбөрийн хүрээнд хамтын ажиллагааг өргөжүүлэх, тодорхой үр дүнд хүрэх чиглэлд Оман Улс бэлэн байгааг илэрхийлжээ.
Энэхүү уулзалт нь Монгол, Оманы найрсаг харилцаа, хамтын ажиллагааг бодитоор гүнзгийрүүлэх, хоёр орны дипломат харилцааг агуулга, цар хүрээний хувьд улам өргөтгөх алхам боллоо.
Эх сурвалж: Гадаад харилцааны яам
