Монгол Улсын Ерөнхийлөгч Ухнаагийн Хүрэлсүх “Тогтвортой байдлын яриа хэлэлцээ 2025 – Уур амьсгалын өөрчлөлт: Тэрбум мод” чуулга уулзалтад оролцож буй НҮБ-ын 8 дахь Ерөнхий нарийн бичгийн дарга, “Бан Ги Мүн” сангийн тэргүүн Бан Ги Мүнийг хүлээн авч уулзлаа.

Ерөнхийлөгч У.Хүрэлсүх НҮБ-ын Ерөнхий нарийн бичгийн даргаар ажиллаж байх хугацаандаа дэлхийн тогтвортой хөгжлийн зорилтуудыг хэрэгжүүлэх, байгаль орчныг хамгаалах, уур амьсгалын өөрчлөлтийн эсрэг тууштай зүтгэж ирсэн Бан Ги Мүний хувь нэмрийг өндрөөр үнэлж байгаагаа илэрхийлэв. Мөн түүний энэхүү манлайлал өнөөдөр ч үргэлжилж байгаад сэтгэл хангалуун байгаагаа тэмдэглэн, хамтран зохион байгуулж буй энэхүү чуулга уулзалтыг цар хүрээ, агуулгын хувьд чухал алхам гэж үзэж буйгаа онцоллоо.

Бан Ги Мүн ч Монгол Улсын Ерөнхийлөгчийн уур амьсгалын өөрчлөлтийн эсрэг санаачилга, тэр дундаа “Тэрбум мод” үндэсний хөдөлгөөн нь бүс нутгийн хэмжээнд үлгэр дуурайл болохуйц ажил гэж үзэж байгаагаа илэрхийлсэн байна. Тэрбээр дэлхийн улс орнууд Монголын энэхүү санаачилгаас урам авч, ижил төстэй хөтөлбөрүүдийг өрнүүлнэ гэдэгт итгэлтэй буйгаа илэрхийлжээ.

Мөн “Бан Ги Мүн” сангаас цаашид:

• Тогтвортой хөгжлийн зорилтыг хэрэгжүүлэх,

• Уур амьсгалын өөрчлөлттэй тэмцэх,

• Эмэгтэйчүүдийн манлайллыг дэмжих,

• Хүүхэд, залуучуудын оролцоог нэмэгдүүлэх,

зэрэг чиглэлд Монгол Улстай хамтран ажиллах хүсэлтэй байгааг онцолсон байна.

Уулзалтын үеэр “Бан Ги Мүн” сан “Тэрбум мод” үндэсний хөдөлгөөнийг дэмжиж 180 сая төгрөгийн хандив өргөсөн бөгөөд уг хөдөлгөөнийг бүс нутгийн хэмжээний хамтын ажиллагаанд хүргэх санал дэвшүүлжээ.

Эх сурвалж: Монгол Улсын Ерөнхийлөгчийн Тамгын газрын Хэвлэл мэдээллийн алба