Олон улсын прокуроруудын холбооны Зүүн Европ, Төв Азийн бүс нутгийн Х бага хурал Улаанбаатар хотноо болж байна. “Прокурорын үүрэг оролцооны хувьсал: цахим орчин дахь гэмт хэрэгтэй тэмцэх сорилтууд ба сайн туршлага” сэдвээр өрнөж буй тус хуралд Улсын Их Хурлын дарга Д.Амарбаясгалан, УИХ-ын гишүүн, МАН-ын бүлгийн дарга С.Мөнхбаатар, УИХ-ын Ерөнхий нарийн бичгийн дарга Б.Баасандорж нар оролцлоо.

УИХ-ын дарга Д.Амарбаясгалан хурлын нээлтийн үеэр хэлсэн үгэндээ цахим орчин, нийгмийн сүлжээг ашиглан хүний эрх, эрх чөлөөг зөрчих, эдийн засаг, ёс суртахууны хохирол учруулж буй гэмт хэргүүд дэлхий дахинд төдийгүй Монгол Улсад ч ноцтой түвшинд хүрснийг онцолсон. Тиймээс энэ удаагийн олон улсын хурал нь прокуроруудын хамтын ажиллагааг бэхжүүлж, үр дүнтэй туршлагыг харилцан хуваалцах, эрх зүйн орчныг сайжруулахад чухал ач холбогдолтой болохыг тэрбээр илэрхийлэв.

Мөн тэрбээр Монгол Улсын парламент шинэчлэлийн бодлогоо “хүн төвтэй, олон ургалч үзэлтэй” байхаар тодорхойлсон бөгөөд энэ хүрээнд цахим гэмт хэрэгтэй тэмцэх, түүнээс урьдчилан сэргийлэх хууль эрх зүйн шинэчлэл хийхэд бэлэн гэдгийг онцлон дурдав. Хурлын явцад боловсронгуй хууль тогтоомж боловсруулахад чиглэсэн санал, санаачилгыг Монголын парламент нээлттэй хүлээн авч, цаашдын бодлого, үйл ажиллагаандаа тусгах болно гэдгээ ч илэрхийлжээ.

Энэхүү бага хурал нь цахим гэмт хэргийн эсрэг олон улсын хэмжээний хамтын ажиллагаа, мэдлэг, туршлага солилцоог гүнзгийрүүлэхэд түлхэц болохоос гадна прокуроруудын оролцоо, үүргийг шинэ түвшинд авч үзэх шаардлагыг онцлон харуулж байна.

Эх сурвалж: Parliament.mn