НҮБ, Европын холбоо болон дэлхийн 70 гаруй орны төр, хувийн хэвшлийн төлөөлөл 2025 оны тавдугаар сарын 29-30-ны өдрүүдэд Казахстан Улсын нийслэл Астана хотод чуулж, энх тайван, эдийн засгийн хамтын ажиллагаа, хиймэл оюун ухаан, байгалийн баялгийн зохистой ашиглалт зэрэг сэдвүүдийг хэлэлцлээ.

Чуулганыг нээсэн Казахстан Улсын Ерөнхийлөгч Касым-Жомарт Токаев дэлхийн эдийн засагт зэвсэгт мөргөлдөөн, худалдааны зөрчлийн үзүүлж буй нөлөөг онцолж, эдгээрээс үүдэлтэй хохирол 19 их наяд ам.долларт хүрсэн талаар дурдав. Тэрбээр аливаа зөрчилдөөнд яриа хэлэлцээний замаар хандах шаардлага урьд өмнөхөөс илүү нэмэгдэж байгааг тэмдэглэн, НҮБ-ын Аюулгүйн Зөвлөлийн бүрэлдэхүүнийг өргөжүүлэх саналыг дэвшүүлжээ.

Түүнчлэн Казахстан улс хиймэл оюун ухаан, цэвэр эрчим хүчид суурилсан эдийн засгийн шинэ бүтэц рүү шилжих зорилт тавьж, “Крипто хот” байгуулах, NVIDIA компанитай хамтран хоёр квинтиллион үйлдэл/секунд бүхий супер компьютер суурилуулж, шинжлэх ухаан, боловсрол, бизнесийн салбарын хамтын ажиллагааг идэвхжүүлэхээр төлөвлөж буйг танилцуулсан байна. Үндсэн хууль, дагалдах хуулиудад өөрчлөлт оруулж, ерөнхийлөгчийн бүрэн эрхийг долоон жилээр хязгаарлах, парламентын чадавхыг нэмэгдүүлэх зэрэг эрх зүйн шинэчлэлийн талаар ч мэдээлсэн.

Чуулганд Монгол Улсаас Эдийн засгийн бодлого, өрсөлдөх чадварын судалгааны төвийн Удирдах зөвлөлийн дарга П.Цагаан Казахстаны Шадар сайд Серик Жумангарины урилгаар оролцсон бөгөөд тус улсын худалдаа, аж үйлдвэрийн танхим, бизнесийн төлөөлөгчидтэй уулзан туршлага солилцсон байна.

Форумын онцлох зочдын нэг нь “Оюу толгой” ордыг нээхэд оролцсон уул уурхайн мэргэжилтэн Роберт Фридланд байсан бөгөөд тэрбээр уул уурхайн салбар байгальд үзүүлэх нөлөөллийг бууруулах, олборлолтыг роботжуулах, эрчим хүч хэмнэх технологийн чиг хандлагын талаар ярилцжээ. Форумын өмнөх өдөр Ерөнхийлөгч К.Токаев түүнийг хүлээн авч уулзаж, “Айвенхоу Майнз” компанийн Казахстан дахь зэсийн хайгуул болон холбогдох төслүүдийн талаар санал солилцсон байна.