НҮБ-ын Гамшгийг бууруулах газар болон Швейцарын Засгийн газраас хамтран зохион байгуулж буй “Гамшгийн эрсдэлийг багасгах дэлхийн платформ”-ын VIII хуралдаан Швейцарын Женев хотноо болж байна. Энэ удаагийн чуулган “Гамшгийг даван туулах чадавхыг бэхжүүлэхийн тулд өнөөдрөөс тодорхой үйлдэл хий” уриан дор болж, уур амьсгалын өөрчлөлт, нийгмийн эмзэг байдал, жендэрийн тэгш байдал, ирээдүйн хамтын шийдлүүдийг онцолж байгаагаараа онцлог болж байна.

Хуралд Монгол Улсыг төлөөлөн Онцгой байдлын ерөнхий газрын дарга, хошууч генерал Г.Ариунбуянаар ахлуулсан аймаг, нийслэл, дүүргүүдийн Гамшгийн эрсдэлийг бууруулах орон нутгийн зөвлөлийн дарга нарын төлөөлөл оролцож байгаа юм. Тэд Монгол Улсад гамшгийн эрсдэлийн үнэлгээ, учирсан хохирол, гамшгийн менежмент, хөрөнгө оруулалтын чиглэлээр хийсэн ажлуудын талаарх мэдээлэл, туршлагыг олон улсын төлөөлөгч нартай хуваалцаж байна.

Мөн КАДРИ үнэлгээний багийн 2023-2024 онд Монгол Улсад хийсэн гамшиг, уур амьсгалын эрсдэлийн үнэлгээний үр дүнг танилцуулж, үүнээс гарсан зөвлөмжүүдийг хэрэгжүүлэх цаашдын арга хэмжээний талаар хэлэлцжээ. Гамшгийн эрсдэлийг бууруулах орон нутгийн зөвлөлийн үйл ажиллагаа, ололт амжилт, тулгарч буй хүндрэл бэрхшээл, хэрэгжүүлж буй сайн туршлагын талаар ч мөн чуулганы үеэр дэлгэрэнгүй мэдээлэл өгсөн байна.

Энэ удаагийн чуулганд дэлхийн 130 гаруй орны 4000 гаруй төлөөлөгч оролцож байгаа бөгөөд сайд нарын дугуй ширээний уулзалт, олон талт хэлэлцүүлэг, салбар хуралдаан, сэдэвчилсэн уулзалтууд өрнөж, гамшгаас урьдчилан сэргийлэх, түүнийг даван туулах олон улсын хамтын ажиллагааны чиглэлийг тодорхойлж байна. Чуулганы гол зорилго нь Сендайн үйл ажиллагааны хүрээ баримт бичгийн хэрэгжилтийг эрчимжүүлэхэд гишүүн орнуудын үүрэг, оролцоог нэмэгдүүлэхэд чиглэж байна.