Монгол Улсын Далайн захиргаа болон БНСУ-ын Хөлөг онгоц эзэмшигчдийн холбоо далайн тээвэр, усан онгоцны бүртгэлийн салбарт хамтран ажиллах тухай харилцан ойлголцлын санамж бичигт 2025 оны зургаадугаар сарын 4-ний өдөр гарын үсэг зурлаа.
Энэхүү санамж бичиг нь Монгол Улсын далайн салбарын хөгжлийг дэмжих, хөлөг онгоцны бүртгэлийн чанар, нэр хүндийг дээшлүүлэх, бодлогын түвшний хамтын ажиллагааг өргөжүүлэх, мөн хоёр улсын холбогдох байгууллагуудын хооронд мэдээлэл, туршлага харилцан солилцох нөхцөлийг бүрдүүлж байгаагаараа онцлог юм.
БНСУ-ын Хөлөг онгоц эзэмшигчдийн холбоо нь “HMM”, “Чангым олон улсын ачаа тээвэр”, “Кореа шиппинг” зэрэг далайн болон эргийн тээвэрт тэргүүлэгч 155 байгууллагыг нэгтгэсэн нэр хүндтэй холбоо бөгөөд дэлхийд өндөр эрэмбэтэй, тэргүүлэх далайн тээврийн орнуудын нэг болох БНСУ-ын усан тээврийн бодлогыг тодорхойлогч гол тоглогчдын нэг юм.
Монгол Улс далайд гарцгүй орны хувьд хөлөг онгоцны бүртгэлийн үйл ажиллагааг олон улсын түвшинд өргөжүүлэн, далайн эрх зүйн орчноо сайжруулах, стратегийн түншлэлүүдийг бэхжүүлэхэд зорьж буй энэ үед тус санамж бичиг нь бодитой, шинэлэг хамтын ажиллагааны гараа болох төлөвтэй байна.
