Монгол Улс Япон улсын Токио хотноо тавдугаар сарын 30-31-нд зохион байгуулагдсан Ази, Номхон Далайн орнуудын цахилгаан холбооны байгууллагын сайд нарын зөвлөлдөх уулзалтын үеэр харилцаа холбоо, мэдээллийн технологийн салбар дахь ололт амжилтаа олон улсын түншүүддээ танилцууллаа.

Уг уулзалтад Цахим хөгжил, харилцаа холбооны яамны сайдын зөвлөх М.Тулгат, Монгол Шуудан компанийн гүйцэтгэх захирал Г.Тэлмэн, Үндэсний дата төвийн Мэдээллийн технологийн газрын дарга Д.Цэнгүүнжав нар оролцсон бөгөөд тэд “e-Mongolia” нэгдсэн системээр дамжуулан төрийн үйлчилгээг иргэдэд цахимаар хүргэх шийдлүүд, түүний үр дүн, хэрэгжилтийн явц, бүс нутгийн хамтын ажиллагаанд оруулж буй хувь нэмрийг танилцуулсан юм.

Түүнчлэн Японы Дотоод хэрэг, харилцаа холбооны сайд Мүраками Сэйичиро болон Ази, Номхон далайн цахилгаан холбооны байгууллагын ерөнхий нарийн бичгийн дарга Кондо Масаноритай уулзаж, олон талт хамтын ажиллагааны талаар санал солилцжээ.

Зөвлөлдөх уулзалтын хүрээнд дараах гол санаачилгыг дэвшүүлэн хэлэлцсэн байна:

• “e-Mongolia” платформыг бүс нутгийн бусад улс орнуудад экспортлох, туршлага хуваалцах

• Хиймэл оюун ухаанд суурилсан кибер аюулгүй байдлын болон олон улсын дата төвийг Монгол Улсад байгуулах

• Транзит шуудан илгээмжийн хамтын ажиллагааг өргөжүүлэх

• Бүх нийтийн үйлчилгээний үүргийн сангийн механизмыг шинэчлэхэд хамтран ажиллах

Монгол Улс нь харилцаа холбоо, мэдээллийн технологийн салбараа бүс нутгийн түвшинд хөгжүүлэхэд идэвхтэй оролцож, өөрийн дэвшилтэт шийдэл, туршлагаа хуваалцан, бүс нутгийн хамтын ажиллагааг бэхжүүлж байгааг уулзалтын оролцогчид онцлон тэмдэглэлээ.