Оросын Засгийн газрын шийдвэрээр Монгол, Казахстан зэрэг визийн шаардлагаас чөлөөлөгдсөн орны иргэдийг 2025 оны зургаадугаар сарын 30-наас эхлэн шинэ журамтайгаар улсын хилээр нэвтрүүлэх болсныг албан ёсоор мэдэгдлээ. Энэ өөрчлөлт нь ОХУ-д зорчих гэж буй иргэдэд хэд хэдэн чухал шаардлага, шинэчлэл дагуулж байна.

Юуны өмнө, ОХУ-д зорчих иргэд зорчихоосоо 72 цагийн өмнө Gosuslugi.ru сайтаар дамжуулан “Госуслуги RuiD” гар утасны аппликейшн суулган, хувийн мэдээллээ урьдчилан бүртгүүлэх үүрэгтэй. Энэхүү бүртгэлд дараах мэдээллийг багтаана:

• овог, нэр

• төрсөн он сар өдөр

• гадаад паспортын мэдээлэл

• ОХУ-д зорчих огноо болон байршил

• сүүлийн үеийн цээж зураг

• хүчинтэй эмнэлгийн даатгал

Бүртгэл амжилттай хийгдсэн тохиолдолд тусгай QR код олгогдож, энэ нь ОХУ-ын хилээр нэвтрэх цорын ганц баталгаа болох юм. Хэрэв иргэн QR кодгүй бол Оросын хилийг давах боломжгүйг албаныхан онцолсон байна.

Журамд зааснаар, дараах иргэд мөн адил бүртгэлд хамрагдах үүрэгтэй:

• ОХУ-д суугаа дипломат төлөөлөгчийн газрын ажилтнууд болон гэр бүлийн гишүүд

• ОХУ-д түр буюу байнга оршин суух зөвшөөрөлтэй гадаадын иргэд

• ОХУ-д нэвтрэх хүчин төгөлдөр визтэй бүх иргэд

• зургаагаас доош насны хүүхдүүд

Түүнчлэн цахим орчны аюулгүй байдлын хүрээнд нэгэн чухал анхааруулга гаргасан нь олон нийтийн сүлжээнд Украины далбаа, дайны эсрэг пост, хаштаг, сэтгэгдэл, лайк зэрэгтэй холбоотой аливаа үйлдэл хийсэн тохиолдолд хаяг түр хаагдах, улс төр, дайнтай холбоотой зураг, мэдээлэл байршуулсан бол устгах шаардлага тавигдана гэдгийг иргэдэд онцгойлон анхааруулжээ.

Шинэ журмын хэрэгжилт нь ОХУ-д зорчиж буй гадаадын иргэдийн хөдөлгөөнийг цахим хэлбэрээр урьдчилан хянах, дотоод аюулгүй байдлыг хангах зорилготой хэмээн үзэж байна.