Олон улсын прокуроруудын холбооны Зүүн Европ, Төв Азийн бүс нутгийн 10 дахь удаагийн бага хурал Улаанбаатар хотын Шангри-Ла зочид буудалд эхэллээ. “Прокурорын үүрэг, оролцооны хувьсал: Цахим орчин дахь гэмт хэрэгтэй тэмцэх сорилтууд, сайн туршлага” сэдвийн хүрээнд болж буй энэхүү хуралд 25 улсын 100 орчим төлөөлөгч оролцож байна.

Хурлыг нээж Монгол Улсын Ерөнхийлөгч У.Хүрэлсүх үг хэлэхдээ, цахим орчин, кибер аюулгүй байдлын тулгамдсан асуудал нь улс орнуудын хил хязгаараас үл хамааран прокурорын байгууллагуудад урьд хожид байгаагүй шинэ сорилт тулгаж байгааг онцлон тэмдэглэв. Тэрбээр, энэ чиглэлд хамтын хүчин чармайлт, уялдаа холбоотой бодлого, цогц шийдэл чухал болохыг онцолж, прокурорууд шударга ёсыг бэхжүүлэхэд үнэтэй хувь нэмэр оруулах болно гэдэгт итгэж буйгаа илэрхийллээ.

Монгол Улс ардчилал, хүний эрх, хууль дээдлэх зарчимд суурилсан үнэт зүйлсийг тууштай хамгаалж, прокурорын байгууллагын хараат бус байдал, бие даасан байдлыг бэхжүүлэх, эрх зүйн шинэчлэлийг эрчимжүүлэх чиглэлд идэвхтэй ажиллаж буйгаа Ерөнхийлөгч онцолсон юм.

Энэхүү хуралдаанаар дараах сэдвүүдийг хэлэлцэж байна:

• Олон нийтийн сүлжээ ба гэмт хэргийн хувьсал, чиг хандлага

• Цахим орчинд үйлдэгдэж буй хүүхдийн эсрэг гэмт хэрэгтэй тэмцэх нь

• Технологийн дэвшил, инновацыг гэмт хэрэгтэй тэмцэхэд ашиглах нь

• Хүн худалдаалах гэмт хэрэг: Бүс нутгийн чиг хандлага, стратеги, хохирогчийг хамгаалах ажиллагаа

Олон улсын прокуроруудын холбоо нь 1995 онд байгуулагдсан бөгөөд дэлхийн 177 орны 183 гишүүн байгууллага, 1,900 орчим бие даасан гишүүнтэй байгууллага юм. Энэ удаагийн хурлыг тус холбоо болон Монгол Улсын Ерөнхий прокурорын газар хамтран зохион байгуулж байна.