Улсын Их Хурлын даргын 2024 оны 42 дугаар захирамжаар байгуулагдсан ажлын хэсгээс 2025 оны зургадугаар сарын 4-ний өдөр Хөдөө аж ахуйн тухай хуулийн төслийн гурав дахь хэлэлцүүлгийг зохион байгууллаа. Хэлэлцүүлэгт УИХ-ын гишүүд, судлаач, хуульчид оролцож, хөдөө аж ахуйн салбарын эрх зүйн шинэчлэл, хүнсний аюулгүй байдал, хүнсний хангамжийг зохицуулах хуулийн төслүүдийн талаар өргөн хүрээтэй санал солилцов.

УИХ-ын гишүүн, ажлын хэсгийн ахлагч М.Мандхай хэлэлцүүлгийг удирдан явуулж, Хөдөө аж ахуйн тухай хуулийн төслийн үзэл баримтлалыг танилцуулахдаа салбарын 27 хуулийн хүрээнд хөдөө аж ахуйн үйлдвэрлэлийн асуудлыг цогцоор нь хамарсан “малгай хууль” үгүйлэгдэж байгааг онцлон тэмдэглэлээ. Мал аж ахуй болон газар тариалангийн үйлдвэрлэл төрийн бодлого, эрх зүйн хувьд уялдаагүй, дэмжлэгийн тэгш бус хуваарилалтаас үүдэн хоёр салбар харилцан уялдах боломжгүй байгааг тэрбээр тодотголоо.

Хуулийн төсөлд дараах үндсэн чиглэлүүд тусгагдсан байна:

• Хөдөө аж ахуйн үйлдвэрлэлийг төрөлжүүлэн хөгжүүлэх эрх зүйн орчныг бүрдүүлэх

• Бүсчилсэн хөгжлийн хүрээнд хөдөө аж ахуйн бүс нутгийг тодорхойлох

• Бүтээгдэхүүний өртгийн сүлжээг нэгдмэл зохион байгуулалттай болгох

• Бүртгэл, хяналтын тогтолцоог сайжруулах

• Мал, амьтны халдварт өвчнөөс ангид эрүүл бүсийг баталгаажуулах

• Төрийн дэмжлэг, хөрөнгө оруулалтыг чиглэл, төрөлтэй нь уялдуулан тодорхой болгох

Танилцуулгатай холбогдуулан УИХ-ын гишүүд Б.Баярбаатар, Ж.Бат-Эрдэнэ, Бадамсүрэн, Л.Энхнасан, Хосбаяр нар асуулт асууж, зорилго, үр дүн, хариуцлагын тогтолцооны талаар байр сууриа илэрхийллээ. Ж.Бат-Эрдэнэ гишүүн хөдөө аж ахуйн салбар төрийн дэмжлэггүйгээр хөгжихгүй гэдгийг онцолж, дэмжлэг болон зорилтын уялдаа, хариуцлагын механизмыг тусгаж өгөхийг санал болголоо.

Байнгын хорооны дарга Б.Бейсен салбарын боловсон хүчний дутагдал, дэд бүтцийн хүрэлцээ, дэмжлэгийн бодлого зэргийг хөндөв. Ажлын хэсгийн зүгээс хууль батлагдсанаар төрийн бодлого илүү чиглэсэн, тодорхой болж, хувийн хэвшил, иргэний нийгмийн оролцоо нэмэгдэнэ гэж тайлбарлалаа.

Мөн хэлэлцүүлгийн үеэр Хүнсний тухай хуульд нэмэлт, өөрчлөлт оруулах тухай болон Хүнсний бүтээгдэхүүний аюулгүй байдлыг хангах тухай хуулийн нэмэлт, өөрчлөлтүүдийн талаар танилцуулсан юм. Үүнд:

• Хүнсний сүлжээг бүхэлд нь мэргэжлийн хяналтад хамруулах

• Шим тэжээллэг, баталгаат хүнсний хүртээмжийг нэмэгдүүлэх

• Халдварын бус өвчлөл буурч, эрүүл мэндийн зардал багасах

• Хэрэглэгч сонголтоо мэдээлэлд тулгуурлан хийх чадвартай болох

• Хүнсний чиглэлийн үйл ажиллагаа эрхлэгчийн хариуцлага дээшлэх

• Стандартыг мөрдөж, тээвэрлэлт, хадгалалт, худалдааны зохицуулалт сайжрах

• Цэцэрлэг, сургуулийн хүүхдүүдийн хүнсний хангамжийг баталгаажуулах

Эдгээр хуулиудын хэрэгжилт нь хүнсний баталгаат байдлыг хангах, экспортын өсөлт бий болгох, олон улсын зах зээлд өрсөлдөх чадварыг нэмэгдүүлэх ач холбогдолтой хэмээн онцолжээ.

Эх сурвалж: Улсын Их Хурлын Хэвлэл мэдээллийн газар