Билгийн тооллын XVII жарны “Элдэв эрдэнэт” хэмээх модон могой жилийн зуны тэргүүн сарын цагаагчин могой сарын шинийн 9-ний хөх луу өдрийн морин цагт Бүх цэргийн Их хар сүлдийг цэнгүүлэх тайлгын ёслол Төв аймгийн Эрдэнэ сумын нутаг дахь түүхэн Агуйт ууланд хүндэтгэлтэйгээр зохион байгуулагдлаа.

Монгол төр, цэргийн сүр хүчний оройн дээд бэлгэдэл болсон Их хар сүлдийг тайх энэхүү ёслолд Монгол Улсын Ерөнхийлөгч, Зэвсэгт хүчний Ерөнхий командлагч У.Хүрэлсүх, Батлан хамгаалахын сайд С.Бямбацогт, ЗХЖШ-ын дарга, хошууч генерал С.Ганбямба болон Төрийн цэргийн, хууль сахиулах байгууллагуудын удирдлагууд, Зэвсэгт хүчний нэгтгэл, анги байгууллагын төлөөлөл оролцов.

Их хар сүлдийг Агуйт уулын оргилд тусгайлан зассан дорно, умар, өрнө, өмнө чиглэлд байрлуулсан элч сүлдүүдийн хамт тайлж, Төрийн хонжингийн удирдлага дор, Монгол Улсын Ерөнхийлөгчийн 2017 оны 126 дугаар зарлигаар батлагдсан тусгай журмын дагуу ёслолыг гүйцэтгэв. Энэхүү үйл явдал нь цэргийн ёс заншлыг дээдлэн хүндэтгэх, зэвсэгт хүчний сүлд хийморийг бадраах, эрэлхэг дайчдын эрдэм чадлыг илэрхийлсэн тайлгын нэгэн томоохон уламжлал юм.

Их хар сүлдийг хоёр төрөлтэй тайлдаг бөгөөд “цэнгүүлэх тайлга”-ыг хоёр жилд нэг удаа, “цагаалах тайлга”-ыг жил бүр үйлддэг. Харин энэ удаагийнх нь цэнгүүлэх тайлга байсан бөгөөд сүлдийн сүр хүчийг бадрааж, төрийн хүндэтгэл, цэргийн нэр төрийг мандуулах онцгой ач холбогдолтой байлаа.

Ёслол үйлдсэн Агуйт уул нь Баянзүрх хайрханы салбар уул бөгөөд Монголын эзэнт гүрний үед Чингис хааны түмэн хишигтэн байрлаж байсан, түүхэнд их хааны ташуур олдсон газар хэмээн тэмдэглэгддэг, онцгой шүтээнтэй нутаг юм.

Эх сурвалж: НЗДТГ-ын хэвлэл мэдээлэл, олон нийттэй харилцах хэлтэс