Монгол Улсын Засгийн газартай тохиролцсоны үндсэн дээр Нэгдсэн Үндэстний Байгууллагын Хүнс, хөдөө аж ахуйн байгууллагын (ХХААБ) Монгол дахь суурин төлөөлөгчөөр Др. Чинюн Диао томилогдон, 2025 оны тавдугаар сарын 28-наас үүрэгт ажилдаа орлоо.
БНХАУ-ын иргэн Др.Диао нь хөдөө аж ахуйн салбарын судалгаа, хөгжүүлэлт болон олон улсын хамтын ажиллагааны 25 жилийн туршлагатай судлаач, удирдагч юм. Тэрээр Бээжингийн Хөдөө аж ахуйн их сургуульд шавьж судлалын (энтомологи) чиглэлээр бакалаврын зэрэг эзэмшсэн бөгөөд улмаар шинжлэх ухааны магистр болон философийн ухааны докторын зэргийг хамгаалсан байна.
Өмнө нь тэрээр:
-
2023 оноос Намиби улсад ХХААБ-ын суурин төлөөлөгчөөр ажилласан
-
2018 онд Мексик дэх БНХАУ-ын ЭСЯ-нд хөдөө аж ахуйн асуудал хариуцсан нэгдүгээр нарийн бичгийн даргаар томилогдон ажилласан
-
1998 онд ажлын гараагаа Бээжингийн Зөгий судлалын институтаас эхэлж, 2007-2015 онд тус байгууллагын менежментийн газрын захирлаар, олон улсын хамтын ажиллагааны төслийн ахлагчаар ажилласан
-
2010-2015 онд Хятадын үндэсний тэргүүлэх технологийн судалгаа, хөгжлийн хөтөлбөрт эрдэм шинжилгээний ахлах ажилтан
-
2014-2022 онд Зөгий судлалын институтын Олон улсын хамтын ажиллагааны төслийн газрын захирал
-
2015-2021 онд Хятадын Хөдөө аж ахуйн шинжлэх ухааны академийн Зөгий хамгаалах инновацийн багийн ахлах ажилтан зэрэг хариуцлагатай албан тушаал хашиж байжээ.
Др.Диао нь өмнөх төлөөлөгч Др.Винод Ахужагийн эхлүүлсэн ажлыг үргэлжлүүлж, Монгол Улсад хөдөө аж ахуйн салбарын тогтвортой хөгжил, хүнсний аюулгүй байдлыг хангахад чиглэсэн олон улсын хамтын ажиллагааг гүнзгийрүүлэн ажиллахаа илэрхийлсэн байна.
Эх сурвалж: ХХААБ
