Засгийн газрын 2025 оны зургаадугаар сарын 4-ний өдрийн ээлжит хуралдаанаар Хувийн нэмэлт тэтгэврийн тухай хуулийн төслийг хэлэлцэж, Улсын Их Хуралд өргөн мэдүүлэхээр шийдвэрлэлээ. Энэ хууль нь тэтгэврийн тогтолцооны шинэчлэлийн хүрээнд хувийн хэвшлийн оролцоог нэмэгдүүлэх, ахмад настанд олон эх үүсвэрээс тэтгэвэр авах боломж бүрдүүлэхэд чиглэж байна.

Монгол Улсын урт болон дунд хугацааны хөгжлийн бодлогод тусгаснаар, иргэдийг илүү олон жил тасралтгүй ажиллаж, шимтгэл төлөхөд урамшуулах, сайн дурын нэмэлт даатгалын тогтолцоог дэмжих, тэтгэврийн тогтолцоог шинэчлэх нь чухал зорилтын нэг болсон. Үүнийг хэрэгжүүлэх ажлын хүрээнд уг хуулийн төслийг боловсруулжээ.

Хуулийн төсөлд дараах үндсэн зохицуулалтууд багтсан байна:

• Хувийн нэмэлт тэтгэврийн хөтөлбөр хэрэгжүүлэх

• Тэтгэврийн хуримтлал үүсгэх болон хөрөнгө оруулалт хийх

• Нэмэлт тэтгэвэр олгох, тэтгэврийг өвлүүлэх боломж бүрдүүлэх

• Мэдээллийн сан бүрдүүлж, хяналтын тогтолцоог бий болгох

• Оролцогч талуудын эрх ашгийг хамгаалах хууль эрх зүйн орчин бүрдүүлэх

Хууль батлагдсанаар:

• Хувийн тэтгэврийн системийг зохицуулсан анхны эрх зүйн орчин бүрдэнэ

• Ажил эрхлэлтийн тогтвортой байдал нэмэгдэж, хуримтлалтай иргэд тодорхой хувийг эрүүл мэнд, боловсрол, ипотекийн зээл зэрэгт зориулан ашиглах боломжтой болно

• Тэтгэврийн сангийн хөрөнгө оруулалт эдийн засгийн идэвхжлийг дэмжиж, санхүү, хөрөнгийн зах зээлийн өсөлтөд түлхэц үзүүлнэ

• Ахмад настанд олон эх үүсвэр бүхий тэтгэврийн орлого, мөн өвлөгдөх тэтгэврийн тогтолцоо бий болох юм

Засгийн газар энэхүү хуулиар иргэдийн амьдралын баталгааг хангах, нийгмийн хамгааллын хүрээг өргөтгөх, хувийн хэвшлийн идэвхтэй оролцоог дэмжихэд чухал алхам болно гэж үзэж байна.

Эх сурвалж: Засгийн газрын хэвлэл мэдээлэл, олон нийттэй харилцах газар