Бүгд Найрамдах Солонгос Улсын Хөдөө, орон нутгийн хөгжлийн захиргаанаас санаачлан хэрэгжүүлж буй “Ази тивийн улсуудын хүнс, хөдөө аж ахуйн салбарын хамтын ажиллааны санаачилга” (AFACI)-ын долоо дахь удаагийн Ерөнхий ассемблейн чуулганд Монгол Улсыг төлөөлөн Хүнс, хөдөө аж ахуй, хөнгөн үйлдвэрийн яамны Төрийн нарийн бичгийн дарга Т.Жамбалцэрэн оролцлоо.
Непал Улсын нийслэл Катманду хотноо болсон тус чуулганд AFACI-ийн 15 гишүүн орны төлөөлөгчид оролцож, тус санаачилгын хүрээнд хэрэгжүүлж буй төсөл, хөтөлбөрүүдийн хэрэгжилт, үр дүнг хэлэлцэн, цаашдын бодлогын чиглэлийг тодорхойлсон юм. Салбарын төлөөллүүд хүнсний аюулгүй байдал, уур амьсгалын өөрчлөлтөд дасан зохицох арга зам, шинжлэх ухаанд суурилсан хөдөө аж ахуйн бодлогын чиг хандлагын талаар харилцан санал солилцов.
Чуулганы үеэр AFACI-ийн гишүүн орнуудын саналаар Монгол Улсыг тус санаачилгын Дэд даргалагч орноор гурван жилийн хугацаатай томилсон нь хөдөө аж ахуйн салбар дахь манай орны идэвхтэй оролцоо, хамтын ажиллагааг олон улсад үнэлсэн явдал боллоо.
Монгол Улс цаашид бүс нутгийн хамтын ажиллагааг улам гүнзгийрүүлж, уур амьсгалын өөрчлөлтөд дасан зохицохуйц, тогтвортой хөгжлийг хангах шинжлэх ухаанд суурилсан арга замуудыг хэрэгжүүлэх, туршлага хуваалцах чиглэлд гол анхаарлаа хандуулахаа илэрхийлсэн байна.
Эх сурвалж: ХХААХҮЯ
