Засгийн газрын өнөөдрийн хуралдаанаар Нийгмийн даатгалын багц хуульд нэмэлт, өөрчлөлт оруулах тухай хэд хэдэн хуулийн төслийг хэлэлцэн дэмжиж, Улсын Их Хуралд өргөн мэдүүлэхээр шийдвэрлэлээ. Үүнд:

• Нийгмийн даатгалын ерөнхий хууль

• Тэтгэврийн тухай хууль

• Тэтгэмжийн тухай хууль

• Үйлдвэрлэлийн осол, мэргэжлээс шалтгаалсан өвчний тэтгэвэр, тэтгэмж, төлбөрийн тухай хууль

Эдгээр хуулийн төсөл нь нийгмийн даатгалын тогтолцоог илүү уян хатан, хүртээмжтэй, санхүүгийн хувьд тогтвортой болгоход чиглэсэн шинэчлэл юм.

Хуулийн төслөөр дараах гол зохицуулалтуудыг тусгажээ:

• Тэтгэврийн тогтолцоог олон давхаргат болгоно – Даатгуулагчид суурь тэтгэврээс гадна хувийн нэмэлт тэтгэврийн сангаас ч тэтгэвэр авах боломж бүрдэнэ. Энэ нь иргэдийн өндөр насны баталгааг сайжруулна.

• Ажил олгогчдын шимтгэлийн ачааллыг багасгана – Үйлдвэрлэлийн осол, мэргэжлээс шалтгаалсан өвчний шимтгэлийн хэмжээг бууруулж, цалингийн дээд хязгаар тогтоосноор ажил олгогчид ирэх санхүүгийн дарамт багасна.

• Залуус, ахмадуудын хөдөлмөр эрхлэлтийг дэмжинэ – Ажил олгогч оюутан, залуучууд болон ахмад настныг ажиллуулсан тохиолдолд нийгмийн даатгалын шимтгэлийн хөнгөлөлт эдэлнэ.

• Шимтгэл төлөлтийг уян хатан болгоно – Хөлсөөр ажиллах, ажил гүйцэтгэх гэрээ болон давхар ажил эрхэлж буй иргэд нийгмийн даатгалын шимтгэлийг уян нөхцөлөөр төлөх боломжтой болно.

• Ажиллах хүчний ур чадварыг нэмэгдүүлнэ – Хөдөлмөрийн зах зээлд дадлагажсан, мэргэшсэн, нийгмийн даатгалд хамрагдсан ажиллах хүчийг нэмэгдүүлэхэд чиглэсэн бодлого хэрэгжинэ.

Эдгээр шинэчлэл нь тэтгэврийн даатгалын сангийн ачааллыг зохистой түвшинд барих, улсын төсвийн санхүүжилтийг оновчтой зарцуулах, иргэд, ажил олгогчдод ээлтэй, уян хатан орчин бүрдүүлэх чухал ач холбогдолтой юм.

Эх сурвалж: Засгийн газрын хэвлэл мэдээлэл, олон нийттэй харилцах газар