Засгийн газрын өнөөдрийн ээлжит хуралдаанаар Татварын ерөнхий хуульд нэмэлт, өөрчлөлт оруулах тухай хуулийн төслийг хэлэлцэж, Улсын Их Хуралд өргөн мэдүүлэхээр шийдвэрлэлээ. Энэхүү хууль батлагдсанаар татвар төлөгчдөд үзүүлэх зөвлөн туслах үйлчилгээний хүртээмжийг нэмэгдүүлэх, татварын хууль тогтоомжийг хэрэгжүүлэхэд шаардлагатай мэдээлэл, зөвлөгөө авах боломжийг илүү хялбар болгох зорилготой.

Шинэчлэлийн үндсэн агуулгыг дараах байдлаар тодорхойлжээ:

• Татвар төлөгчдөд урьдчилан сануулах, дэмжих тогтолцоо бий болно – Татварын алба хууль хэрэгжилтийн түвшин буурсан, татварын эрсдэлийн үнэлгээ сөрөг гарсан тохиолдолд урьдчилан анхааруулга өгөх бөгөөд ингэснээр татвар төлөгч алдаагаа засах боломжтой болно. Энэ нь татварын зөрчил гарахаас сэргийлж, хууль хэрэгжих түвшинг дээшлүүлэхэд түлхэц үзүүлнэ.

• Акт, торгууль тавихаас илүү итгэл үзүүлж, залруулах боломж олгоно – Хяналт шалгалтын өмнө тайлан залруулах хугацаа олгож, татвар төлөгчдийн чирэгдлийг бууруулах нөхцөл бүрдүүлнэ.

• Санхүүгийн хүндрэлийг харгалзан дансыг хэсэгчлэн битүүмжлэх боломж нээгдэнэ – Хууль батлагдсанаар татварын өртэй иргэн, ААН-ийн дансыг бүхэлд нь хаах бус, тодорхой хэсгийг л битүүмжилж, бизнесийн хэвийн үйл ажиллагааг нь үргэлжлүүлэх боломжтой болгох зохицуулалт оржээ.

Эдгээр зохицуулалтууд нь татвар төлөгчидтэй харилцах харилцааг илүү итгэлцэлд суурилсан, хариуцлагатай, ил тод байдлыг хөхүүлэн дэмжсэн, урьдчилан сэргийлэх механизмтай болгох томоохон алхам хэмээн үзэж байна. Үүний үр дүнд хууль хэрэглээтэй холбоотой маргаан багасч, татварын орчны тогтвортой байдал сайжирна гэж Засгийн газар онцоллоо.

Эх сурвалж: Засгийн газрын хэвлэл мэдээлэл, олон нийттэй харилцах газар