Засгийн газрын ээлжит хуралдаанаар Аж ахуйн нэгжийн орлогын албан татварын тухай хуульд нэмэлт, өөрчлөлт оруулах тухай хуулийн төслийг хэлэлцэн дэмжиж, Улсын Их Хуралд өргөн барихаар шийдвэрлэлээ. Энэхүү хуулийн төслийг бизнес эрхлэгчдийн саналыг тусган боловсруулсан бөгөөд татварын дарамтыг бууруулах, бизнесийн өсөлт, тогтвортой байдлыг дэмжихэд чиглэж байна.

Хуулийн төсөлд туссан гол өөрчлөлтүүд нь дараах байдалтай байна:

• Жижиг, дунд аж ахуйн нэгжүүдийн татварын ачааллыг бууруулна – Татварын орчныг илүү таатай болгохын тулд хялбаршуулсан горимын зохицуулалтыг хадгалж, энэ горимд хамрагдах босго дүнг нэмэгдүүлэхээр тусгажээ.

• Хуримтлал, хүний нөөцийн хөгжилд дэмжлэг үзүүлнэ – ААН-үүдийн санхүүгийн тогтвортой байдлыг дэмжих, цалин урамшуулал болон ажилтнуудын хөгжлийг нэмэгдүүлэх боломжийг татварын хөнгөлөлтөөр дэмжинэ.

• Олон нийтийн саналыг тусгасан – Сангийн яамны цахим хуудсаар нийт 28,386 санал хүлээн авч, судлан нэгтгэсэн байна. Эдгээрээс хуулийн төсөлд тусгах боломжтой зарим арга хэмжээг нэмэлтээр оруулжээ.

Мөн энэ хуулийн төслийг дагалдуулан Мэргэжлийн болон техникийн боловсрол, сургалтын тухай хуульд өөрчлөлт оруулах тухай хуулийн төсөл боловсруулсан байна. Ингэснээр бизнес эрхлэгчид мэргэшсэн ажиллах хүчээр хангагдах боломж нэмэгдэж, татварын орчин урт хугацааны хөгжлийг дэмжих чиглэлд ойртож байна.

Хуулийн төсөл батлагдсанаар Монгол Улсын бизнесийн орчны өрсөлдөх чадвар олон улсын түвшинд сайжирч, эдийн засгийн өсөлтийг дэмжих, нийгмийн тогтвортой байдлыг хангах нөхцөл бүрдэх чухал ач холбогдолтой гэж Засгийн газар үзэж байна.

Эх сурвалж: Засгийн газрын хэвлэл мэдээлэл, олон нийттэй харилцах газар