Засгийн газрын өнөөдрийн ээлжит хуралдаанаар Нэмэгдсэн өртгийн албан татварын тухай хуулийн шинэчилсэн найруулгын төслийг хэлэлцэн дэмжээд Улсын Их Хуралд өргөн мэдүүлэхээр тогтлоо. Энэ шинэчилсэн найруулгыг боловсруулсан гол зорилго нь иргэн, аж ахуйн нэгжүүдийн татварын дарамтыг бууруулж, эдийн засгийн өсөлтийг дэмжихэд чиглэж байгаа юм.

Хуулийн төсөлд тусгасан гол шинэчлэлүүд нь:

• Иргэн, өрхийн татварын ачааллыг бууруулах – Иргэдийн төлсөн НӨАТ-ыг шаталсан байдлаар 100 хүртэл хувиар буцаан олгох зохицуулалт оруулжээ. Энэ нь олон улсын чиг хандлагатай нийцсэн, татварын хөнгөлөлт, чөлөөлөлтийг оновчтой болгох алхам гэж үзэж байна.

• Бизнесийн орчныг сайжруулах – Аж ахуйн нэгжүүдийн мөнгөн хөрөнгийн эргэлтийн дарамтыг багасгаж, бизнесээ тэлэх боломжийг олгох нөхцөл бүрдүүлнэ. Мөн ажилтнуудын хөгжлийг дэмжих, ажиллах орчин нөхцөлийг сайжруулах чиглэлд татварын дэмжлэг үзүүлнэ.

• Гадаадын хөрөнгө оруулалтыг татах – Татварын орчныг өрсөлдөхүйц, ойлгомжтой болгож, гадаадын хөрөнгө оруулагчдад зардал багатай, хялбар нөхцөл бүрдүүлэхийг зорьжээ.

• Цахим шинэчлэл – Хиймэл оюун ухаан, их өгөгдөлд суурилсан шинэ системийг нэвтрүүлж, татварын мэдээллийг цаг алдалгүй авах боломжийг бүрдүүлнэ. Энэ нь татварын хууль тогтоомжийг дагаж мөрдөх үйл явцыг хялбарчилна.

Эдгээр шинэчлэлийн үр дүнд иргэдийн бодит орлого өсч, өрхийн худалдан авах чадвар дээшлэхийн зэрэгцээ аж ахуйн нэгжүүдийн үйл ажиллагааны хүрээ өргөжих, орон нутагт ялгаатай татварын бодлого хэрэгжих боломжтой болно гэж үзэж байна.

Эх сурвалж: Засгийн газрын хэвлэл мэдээлэл, олон нийттэй харилцах газар.