Засгийн газрын ээлжит хуралдаанаар Хувь хүний орлогын албан татварын тухай хуульд нэмэлт, өөрчлөлт оруулах тухай хуулийн төслийг хэлэлцэн дэмжиж, Улсын Их Хуралд өргөн барихаар шийдвэрлэжээ. Энэ нь “Алсын хараа 2050” болон “Шинэ сэргэлтийн бодлого”-ын хүрээнд дэвшүүлсэн дундаж давхаргыг бүрдүүлэх, өрхийн орлогыг нэмэгдүүлэх, худалдан авах чадварыг дээшлүүлэх зорилттой уялдаж байгаа юм.

Тухайлбал, 2024-2028 оны Засгийн газрын үйл ажиллагааны хөтөлбөрт татвар, нийгмийн даатгалын шинэчлэл хийхээр тусгасан бөгөөд энэ хүрээнд дараах зорилтуудыг хэрэгжүүлэхээр тусгасан байна. Үүнд:

• Эдийн засгийн өсөлтийг дэмжих

• Ногоон орон сууцны хүртээмжийг нэмэгдүүлэх

• Бага, дунд орлоготой иргэдийн татварын ачааллыг бууруулах

• Татварын уян хатан, бүсчлэлд нийцсэн бодлого хэрэгжүүлэх

• Цахим татварын тогтолцоог хөгжүүлэх

Хуулийн төслөөр дараах үндсэн гурван чиглэлийг баримтлан зохицуулалт хийжээ.

1. Иргэн, өрхийн татварын ачааллыг бууруулах – Орлогын түвшинг харгалзсан шударга татварын орчин бүрдүүлнэ.

2. Ногоон орон сууцжуулалтыг татварын бодлогоор дэмжих – Эрчим хүчний хэмнэлттэй, байгальд ээлтэй шийдлийг бүсчилсэн хөгжилтэй уялдуулна.

3. Татварын тайлангийн үйл явцыг хялбарчилж, эрсдлээс сэргийлэх – Иргэдийн татвар төлөх ачааллыг багасгаж, урамшууллыг бодит үр ашигтай болгоно.

Хуулийн төсөл батлагдсанаар дараах үр дүнгүүдийг хүлээж байна. Үүнд: өрхийн бодит орлого өсч, худалдан авах чадвар нэмэгдэнэ, орон сууцны хүртээмж сайжирна, бүс нутагт оновчтой татварын бодлого хэрэгжинэ, татвар төлөгчдийн тайлагнах үйл ажиллагаа хялбар болж зардал буурна гэж үзжээ.