Авлигатай тэмцэх газрын Хяналт шалгалт, дүн шинжилгээний хэлтэс 2025 оны тавдугаар сарын 26-30-ны өдрүүдэд нийтийн албанд томилогдохоор нэр дэвшсэн 669 иргэний хувийн ашиг сонирхлын урьдчилсан мэдүүлгийг шалгаж, тэдгээрээс 377 мэдүүлгийг хянан шийдвэрлэсэн байна. Үлдсэн 292 нэр дэвшигчийн мэдүүлэг одоогоор хяналтын шатанд үргэлжилж байгаа тухай АТГ мэдээллээ.
Мөн энэ хугацаанд иргэн, аж ахуйн нэгж, байгууллагаас нийт 75 гомдол, мэдээлэл ирүүлснээс 64-г нь шалгаж, шийдвэрлэсэн байна. Эдгээр гомдлын хүрээнд “Нийтийн албанд нийтийн болон хувийн ашиг сонирхлыг зохицуулах, ашиг сонирхлын зөрчлөөс урьдчилан сэргийлэх тухай” хуулийн 20, 23 дугаар зүйлсийг зөрчсөн албан тушаалтнуудад хариуцлага тооцуулахаар холбогдох байгууллагад албан бичиг хүргүүлжээ.
Түүнчлэн төлөвлөгөөт хяналт шалгалтын хүрээнд төрийн 4 албан тушаалтны хувийн ашиг сонирхлын болон хөрөнгө, орлогын мэдүүлгийг хянан шалгасан байна. Энэ нь хууль тогтоомжийн хэрэгжилт, албан тушаалтны хариуцлагын тогтолцоог сайжруулах, төрийн албанд итгэх иргэдийн итгэлийг бэхжүүлэхэд чиглэсэн бодит ажил гэж мэргэжилтнүүд онцолж байна.
Эх сурвалж: Авлигатай тэмцэх газар
