Өнөөдөр япон загварын тухай ярихад Йожи Ямамото, Реи Кавакуба зэрэг нэрс түрүүлж дурдагддаг ч үнэндээ тэдний өмнө дэлхийн загварын тайзанд Японыг залсан нэгэн эмэгтэй байлаа. Ханае Мори бол Японы анхны кутюр дизайнер бөгөөд өөрийн үеийн гоёл чимэглэлийн чиг хандлагыг зөөлөн өнгө, торгон материал, эмэгтэйлэг хийцээрээ өөрчилж, дорнын гоо зүйг барууны тансаг загвартай холбосон түүхэн хүн юм.

Тэрээр 1926 онд мэс засалчийн гэр бүлд төрж, Токио Урлагийн их сургуульд япон уран зохиолын чиглэлээр суралцжээ. Харин дайны дараах Японд америк эмэгтэйчүүдийн хувцаслалт, хэлбэр хэмжээсийг хараад өөрийн орны хавтгай эсгүүртэй уламжлалт хувцаснаас өөр сэтгэлгээг нээж харсан нь дизайнер болох суурийг тавьжээ.

Ханае Мори анх оёдлын дугуйланд суралцаж, дараа нь нөхрийнхөө дэмжлэгээр өөрийн жижиг ательег нээн Гинза дүүрэгт люкс бутик болон өргөжүүлжээ. Эмэгтэй хүн гэр бүлтэйгээ зэрэгцэн бизнес эрхлэх нь тухайн цаг үед тийм ч түгээмэл бус байсан ч түүний зориг, нөхрийнх нь ойлголцол Ханаег загварын ертөнцөд гаргах замыг нээв.

Парисын алдарт дизайнерууд болох Живанши, Диор, Карден, Шанель нарын захиалагч болж, тэднээс ажлын арга барилыг нь суралцсан ч, эмэгтэйчүүдийг статусын хэрэгсэл мэт харж байгаад сэтгэл дундуур үлдсэн гэдэг. Харин Коко Шанелийнх шиг эмэгтэй хүнийг хамгаалагдсан, чөлөөт нэгэн байгаасай гэж мөрөөдсөн нь түүний загварын философийг тодорхойлж өгсөн.

Ханае Морийн олон улсад танигдсан анхны үзүүлбэр 1965 онд Нью-Йорк хотод болж, Vogue сэтгүүлд эрвээхэйн хээтэй кимоно-даашинз нь нийтлэгдсэн нь түүнийг танигдахад том түлхэц болжээ. Мөн “Hanae Mori Fragrance” үнэртэн гаргаж, Америкт өөрийн бутикийн салбараа нээсэн нь дэлхийд хүч түрэх эхлэл байв.

Хожим Парист загварын ордон нээж, Грейс Келли зэрэг язгууртнуудын байнгын захиалагч болж чадсан нь түүний байр суурийг бүрэн бататгасан. Морийн загварууд тод өнгө, принттэй торгон даашинз, япон байгалийн урамтай уялдсан уран нарийн эсгүүрээрээ ялгарч байв.

Тэр деконструктив стилийг баримтлагч Ямамото, Кавакубагаас ялгаатайгаар уламжлалт хэлбэр, зохицол, уянгалаг шинжийг илүүд үздэг байв. Эмэгтэй хүний гоо сайхныг тодотгож, энгийн хэрнээ дэгжин өнгө хээтэй бүтээлүүдээрээ тэрээр “Парисын эрвээхэй” хэмээн алдаршжээ.

1992 онд Японы олимпийн шигшээ багийн албан ёсны хувцсыг урлаж, үндэсний түвшинд ч хувь нэмрээ оруулсан. Натурал материал ашиглаж, япон соёл, байгалиас урам авсан нь түүний бүтээлийн мөн чанар байлаа.

Ханае Мори зөвхөн Японы загварыг дэлхийд таниулаад зогсоогүй, уламжлалт камино маягийн гоёлыг мөнхийн сонгодог болгон өөрчилж чадсан анхны дизайнер юм.

Эх сурвалж: Dzen.ru