Монгол Улсын Засгийн газар болон Олон улсын иргэний нисэхийн байгууллага (ICAO) хамтран “Ази, Номхон далайн бүсийн агаарын тээврийг хялбаршуулах форум”-ыг энэ оны долоодугаар сарын 7-8-нд Улаанбаатар хотноо зохион байгуулахаар боллоо. Уг арга хэмжээ нь Чикагогийн конвенцын 9 дүгээр хавсралтын батлагдсаны 75 жилийн ой, Монгол Улсад иргэний нисэх хүчин байгуулагдсаны 100 жилийн ойтой давхацаж буйгаараа онцлогтой.
Форумын хүрээнд бүс нутгийн 39 гишүүн орны төлөөлөгчид Улаанбаатарт чуулж, агаарын тээврийн хялбаршуулалтын үндэсний хөтөлбөр болон холбогдох хороог бэхжүүлэх, хил, гаалийн хяналтыг сайжруулах, бүс нутгийн хамтын ажиллагааг гүнзгийрүүлэх зэрэг олон асуудлыг хэлэлцэх юм. Мөн зорчигчийн мэдээллийн систем (API, PNR), НҮБ-ын CT TRAVEL хөтөлбөр, Нийтийн түлхүүрийн сан (PKD)-ийн хэрэгжилт, хиймэл оюун ухаан, автоматжуулалт болон хил нэвтрэх шинэ технологийн нэвтрэл зэрэг ирээдүйн чиг хандлагуудыг хамрах ажээ.
FALF 2025 нь гишүүн орнуудын агаарын тээврийн байгууллагууд болон олон улсын мэргэжилтнүүдийн хооронд туршлага солилцох, тулгамдаж буй асуудлыг хамтран шийдэх, харилцаа холбоо, хамтын ажиллагааг өргөжүүлэх чухал талбар болох юм. Форумд оролцох хүсэлтэй байгууллага, төлөөлөгчид 2025 оны зургаадугаар сарын 23-ны дотор бүртгүүлнэ.
