Гадаадын иргэн, харьяатын газраас мэдээлснээр, жуулчны визээр буюу К2 ангиллаар Монгол Улсад нэвтэрсэн БНХАУ-ын 18 иргэн хөдөлмөр эрхэлж байсныг илрүүлэн, албадан гаргаж, дахин нэвтрэх эрхийг гурван жилээр хязгаарлажээ.
Тэд Төв аймгийн Баянжаргалан сумын нутагт байрлах “Эрдэнэ майнинг үйлс” ХХК-ийн төмрийн хүдрийн уурхайд ажиллаж байсан бөгөөд энэ нь жуулчны визийн зорилгыг зөрчсөн үйлдэл юм. Ийнхүү ирсэн зорилгоос өөр ажил эрхлэх нь “Гадаадын иргэний эрх зүйн байдлын тухай хууль”-д нийцэхгүй тул хуулийн дагуу ийм арга хэмжээ авчээ.
Гадаадын иргэн К2 визээр Монголд ирэхдээ аялал жуулчлал, амралт, соёлын зорилгоор ирдэг бөгөөд тэдний аяллын маршрут, байрлах байршил, хөтөлбөр тодорхой байх шаардлагатай. Визийн зорилгыг зөрчиж, хөдөлмөр эрхлэх нь хуулиар хориотой тул ийм зөрчил гаргахгүй байхыг Гадаадын иргэн, харьяатын газраас анхааруулсан байна.
Эх сурвалж: ГИХГ
