Монгол Улс болон Бүгд Найрамдах Туркменистан Улсын Ерөнхийлөгч нар хоёр улсын хоорондын 30 гаруй жилийн найрсаг харилцаа, хамтын ажиллагааны ололт амжилтыг хэлэлцэж, харилцааг эдийн засгийн агуулгаар баяжуулах хэтийн төлөв, тэргүүлэх чиглэлүүдийг онцоллоо. Талууд хамтын ажиллагааг зөвхөн уламжлалт салбарт бус, шинэ боломж, хэрэгцээт чиглэлүүдэд тулгуурлан өргөжүүлэх зорилт тавьж байна.

Монгол Улсын Ерөнхийлөгч У.Хүрэлсүх Туркменистан Улстай тогтоосон харилцаа, хамтын ажиллагааг бүхий л салбарт өргөжүүлэн хөгжүүлэхийн төлөө буйгаа илэрхийлээд, харилцан айлчлал богино хугацаанд ээлжлэн явагдаж буй нь хоёр ард түмний нөхөрлөлийг гүнзгийрүүлэхэд чухал нөлөөтэй гэдгийг онцоллоо.

Туркменистаны Ерөнхийлөгч С.Бердымухамедов Монгол Улсад анх удаа төрийн айлчлал хийж байгаадаа талархал илэрхийлж, 2024 онд Монгол Улсын Ерөнхийлөгчийн Ашхабад хотноо хийсэн айлчлалын дараах хамтын ажиллагаа бодит ажил хэрэг болж байгаад сэтгэл хангалуун байгаагаа тэмдэглэлээ.

Талууд харилцааны эрх зүйн үндсийг улам бүр бэхжүүлж, худалдаа, хөдөө аж ахуй, хөнгөн үйлдвэр, шинжлэх ухаан, боловсрол, эрүүл мэнд зэрэг салбарт хамтран ажиллах Засгийн газар хоорондын гэрээ хэлэлцээр байгуулсныг сайшаалаа. “Монгол-Туркменистаны хамтарсан Засгийн газар хоорондын комисс”-ыг байгуулж, эдийн засгийн хамтын ажиллагаанд институцийн түвшний зохицуулалт хийж эхэлсэн нь цаашдын хамтын ажиллагааны суурь болно гэж үзэв.

Зам тээвэр, логистикийн шинэ гарц, чиглэл бий болгох зорилгоор Автотээврийн хамтарсан хороо, хөдөө аж ахуй болон мал эмнэлгийн хамтарсан хороо байгуулсан нь хоёр орны бүтээгдэхүүний солилцоо, худалдааны эргэлтийг нэмэгдүүлэхэд чухал нөлөө үзүүлнэ.

Хөнгөн үйлдвэрийн салбарт төсөл, хөтөлбөр хамтран хэрэгжүүлж, экспорт, импортын барааны нэр төрлийг олшруулах чиглэлээр тодорхой санаачилга дэвшүүлсэн байна. Мөн хоёр улсын их, дээд сургууль хоорондын харилцааг өргөжүүлж, оюутан солилцоо, Засгийн газрын тэтгэлэгт хамрагдах боломжийг нээх талаар ярилцсан бөгөөд соёл, урлагийн хамтын ажиллагааг дэмжихийг ч зорьжээ.

Талууд олон улсын байгууллагуудын хүрээнд байгаль орчин, усны нөөц, уур амьсгалын өөрчлөлт, цөлжилтийн эсрэг хамтран ажиллах байр сууриа дахин нотолж, “Далайд гарцгүй хөгжиж буй орнуудын олон улсын судалгааны төв байгуулах тухай олон талт хэлэлцээр”-т Туркменистан нэгдсэнд Монгол Улс талархал илэрхийллээ.

Эх сурвалж: President.mn, Turkmenportal.com