Хотын төв талбайд 19 дэх өдрөө үргэлжилж, Ерөнхий сайд Л.Оюун-Эрдэнийг огцруулах шаардлага тавьж буй иргэдийн жагсаалтай холбоотойгоор Засгийн газраас Ерөнхий сайдад итгэл хүлээлгэх тухай тогтоолын төсөл боловсруулж, УИХ-д өргөн бариад байгаа. УИХ өнөөдөр уг асуудлаар шийдвэрээ гаргана. Тэгвэл Итгэл хүлээлгэх тухай тогтоолын төсөл нь хуульд нийцэж байгаа эсэх талаар хуульч Б.Баяраа өөрийн байр суурийг хуваалцжээ.

Б.Баяраа:

-Монгол Улсын Үндсэн хууль, Засгийн газрын тухай хуульд зааснаар итгэл хүлээлгэх тогтоолын төслийг Засгийн газраас УИХ руу оруулах хууль зүйн үндэслэл бий. Гэхдээ Ерөнхий сайд улсын төсвийн болон бодлогын тодорхой асуудлаар өөрт нь итгэл хүлээлгэх тогтоолын төслийг оруулбал хэлэлцэнэ гэж хуулиар хязгаарлаж өгсөн байна.

Харин Засгийн газрын албан тоотоос үзэхэд “үүссэн улс төрийн нөхцөл байдлаас шалтгаалан … бодлогын дэмжлэг шаардлагатай байна” гэсэн нь улсын төсвийн болон бодлогын тодорхой асуудалд огт хамааралгүй юм. Учир нь үүссэн улс төрийн нөхцөл байдал гэдэгт Ерөнхий сайдын орлогоо нотолж чадахгүй байгаа хувийн хариуцлагын асуудал хамаарахгүй. Энэ бол ёс зүйн магадгүй хуулийн хариуцлага хүлээх үр дагавар бүхий тухайн албан тушаалтны хувийн хариуцлагын асуудал болохоос улс төрийн нөхцөл байдал огт биш.

Нөгөөтэйгүүр бодлогын тодорхой дэмжлэг хэрэгтэй гэх боловч Засгийн газрын албан тоотод дурдсан төсөл, хөтөлбөр, зорилтуудыг дэмжсэн УИХ-ын шийдвэр нэгэнт хүчин төгөлдөр байхад дахин дахин хүчинтэй шийдвэрийн талаар итгэл үзүүлэх шийдвэр гаргах шаардлага байхгүй. Өөрөөр хэлбэл тухайн төсөл хөтөлбөр нь Ерөнхий сайд, Засгийн газрын гишүүд хэн байхаас үл шалтгаалан аль ч Засгийн газрын УИХ-ын өмнө хүлээсэн зайлшгүй хэрэгжүүлэх үүрэг даалгавар юм.

Түүнчлэн Засгийн газрын тухай хуульд “өөрт нь итгэл хүлээлгэх төслийг өргөн мэдүүлэхдээ хууль, Улсын Их Хурлын бусад шийдвэр, төсөв тэдгээрийн зүйл, хэсэг, заалтын талаарх өөрийн байр суурь болон Улсын Их Хурлаас дэмжлэг хүсэж байгаа асуудлыг тодорхой илэрхийлсэн байна” гэснийг зөрчиж, Засгийн газраас дутуу мэдээлэл УИХ-д ирүүлсэн байна.