МАХН-ын суу алдарт удирдагч, "Number one" буюу Н.Энхбаярын хаанчлалын үед "Индүү залгасан ч Энхбаяр" гэдэг үг гарсан байдаг юм. Тэгвэл МАН-ын дарга Л.Оюун-Эрдэнийн үед нүд цавчих хооронд нэг хулгай гардаг болов. Хулгайлах юм мундсан юм шиг хууль хүртэл хулгайлна.

Өнөөдөр УИХ дахь намын бүлгүүд болон Төрийн байгуулалтын байнгын хороо, нэгдсэн чуулганаар Ерөнхий сайд Л.Оюун-Эрдэнэд итгэл үзүүлэх эсэх асуудлыг хэлэлцэнэ. Өнгөрөгч долоо хоногт хуралдсан Засгийн газрын ээлжит хуралдаан дээр Ерөнхий сайд Л.Оюун-Эрдэнэт итгэл үзүүлэх эсэх асуудлаар санал хурааж, хуралдаанд оролцсон сайд нарын 100 хувийн саналаар тогтоолын төслийг дэмжсэн. Энэ асуудлаар УИХ өнөөдөр эцсийн шийдвэрийг гаргах ёстой. Товчхондоо Засгийн газар огцрох, эсэх тухай юм.  

Учир нь Ерөнхий сайдын хүү О.Тэмүүлэнгийн орлогоо нотолж чадаагүй тансаг хэрэлээний улмаас иргэд, залуус хотын төв талбайд эсэргүүцлийн жагсаал хийгээд 19 дэх өдрөө үргэлжилж байна. Ерөнхий сайд Л.Оюун-Эрдэнэ болон түүний гэр бүлийнхэн энэ хугацаанд орлогоо нотлох талаар ямар ч үйлдэл хийгээгүйн улмаас "Орлогоо нотол" жагсаал эцэстээ огцруулах жагсаал болон хувирсан билээ.

Гэтэл МАН-ын дарга, Ерөнхий сайд Л.Оюун-Эрдэнэ энэ хугацаанд намын Бага хурлаа зарлан хуралдуулж, АН-ыг хамтарсан Засгийн газраас хөөх шийдвэр гаргуулсан. Харин өөрөө огцрох өргөдлөө өгөхөөр амласан боловч ч мөн л амлалтаасаа буцаж, өөрөө өөртөө итгэл хүлээлгэх тухай тогтоолын төслийг Засгийн газраас гаргуулсан. 

Гэтэл Үндсэн хуулийн 44-р зүйлд, "Ерөнхий сайд улсын төсвийн болон бодлогын тодорхой асуудлаар өөрт нь итгэл хүлээлгэх тогтоолын төслийг оруулбал УИХ арав хоногийн дотор УИХ-ын нийт гишүүний олонхийн саналаар шийдвэрлэнэ. УИХ тогтоолыг батлаагүй бол Ерөнхий сайдыг огцорсонд тооцож, шинэ Ерөнхий сайдыг гуч хоногийн дотор томилно" гэсэн байна. Өөрөөр хэлбэл, Л.Оюун-Эрдэнийн орлогоо нотолж чадахгүй байгаа явдал нь түүнд "итгэл үзүүлэх" үндэслэл болохгүй гэсэн үг. 

Сайн бөх унаж явахдаа ч мэх хийдэг гэдэг шиг Ерөнхий сайд маань унаж явахдаа хүртэл манийгаа дахин "тонгорч" байна. Нүд цавчих хооронд л нэг хулгай...

Б.ЗАЯА