Улсын Их Хурлын ээлжит чуулганы хуралдаан үргэлжилж байгаа энэ өдөр Монгол Улсын Ерөнхий сайдын мэдээлэл цагт Шадар сайд С.Амарсайхан “Боловсролын санхүүжилт, хөрөнгө оруулалтыг нэмэгдүүлж, хүүхэд бүрд тэгш боломж бүрдүүлэх” талаар Ерөнхий сайдыг орлон мэдээлэл хийлээ.
Харин УИХ-ын гишүүн Г.Ганбаатар уг асуудлыг Ерөнхий сайдын түвшинд ярилцах учиртай байсан ч тэр байхгүй байгааг шүүмжлэн, боловсролын салбарын хүнд нөхцөл байдлыг бодитоор тайлбарлав. Тэрээр, “Эрүүл мэнд, боловсрол гэх суурь салбарын тухай ярьж байхад Ерөнхий сайд танхимд орж ирэх ёстой. Огцрох эсэх нь хамаагүй, тэр хүн энэ индэр дээрээс байр сууриа илэрхийлэх ёстой. Хөдөө орон нутагт багшийн хомсдол нүүрлэсэн. Зарим сургуулийн англи хэлний багш нь математик зааж байна. Тухайлбал, Өмнөговь аймаг 1.7 их наядын төсөвтэй атлаа Цогтцэций суманд нэг сургууль нурсан, шинэ сургууль зургаан жил хүлээгдэж, 3000 хүүхэд подваль, жижиг ангиудад 3 ээлжээр хичээллэж байна. Энэ асуудалд бодит хариулт өгөх хэрэгтэй” хэмээв.
Боловсрол, шинжлэх ухааны сайд П.Наранбаяр түүний шүүмжлэлийг хүлээн зөвшөөрч, өнөөгийн нөхцөл байдал ноцтой түвшинд хүрснийг хүлээн зөвшөөрлөө. Тэрээр “Улсын хэмжээнд нийт сурагчдын 88 хувь нь хоёр болон түүнээс дээш ээлжээр хичээллэж байна. Өнгөрсөн оны үнэлгээгээр 4500 орчим багш дутуу байгаа нь боловсролын чанар, хүртээмжид сөргөөр нөлөөлж байгаа. Цаашид шинэ сургууль, цэцэрлэг барих төлөвлөгөөний дагуу 20 мянган багшийн хэрэгцээ нэмэгдэнэ” хэмээн онцолсон юм.
Сайд П.Наранбаярын танилцуулснаар:
-
108 сургууль, 95 цэцэрлэгийг 2028 он хүртэл барихаар төлөвлөсөн;
-
Хуучирсан барилгатай 79 сургуулийг шинэчлэхээр ажиллаж байгаа;
-
Орон нутгийн багшид 40 хувийн нэмэгдэл олгож байгаа нь үр дүн өгч байгаа ч орон сууцны дэмжлэг шаардлагатай;
-
Боловсролын салбарын хөрөнгө оруулалтад нийт 3.9 их наяд төгрөг хэрэгтэй бөгөөд 2026 онд 1.7 их наядыг шийдвэрлэхээр төлөвлөжээ;
-
Үүнээс 1 их наядыг улсын төсвөөс, 460 тэрбумыг нийслэл болон орон нутгийн төсвөөс, 160 тэрбумыг гадаадын зээл, тусламжаар шийдэхээр байна;
-
2030 он гэхэд 80 мянган хүүхдийн тоо нэмэгдэх учраас урьдчилан төлөвлөх шаардлагатай;
-
Багшийн цалинг нэмэх талаар Үйлдвэрчний эвлэлтэй хэлэлцэж эхэлсэн.
2026 оныг “Боловсролын жил” болгон зарласныг сайд онцолж, боловсролын салбарын суурь шинэчлэл, хөрөнгө оруулалтыг бодит үр дүнд хүргэхэд анхаарч ажиллаж байгаагаа илэрхийлэв.
Эх сурвалж: Улсын Их Хурлын чуулганы хуралдааны тэмдэглэл
