УИХ-ын гишүүн Ж.Баярмаа өнөөдөр цаг үеийн асуудлаар сэтгүүлчдэд мэдээлэл хийлээ. /Төрийн ордон 2025.05.30/

Ж.Баярмаа:

-Авлигатай тэмцэх газрын байцаагчтай холбоотой мэдээлэл хийж байна. УИХ-ын гишүүнийн тангараг өргөсөн цагаас эхлэн асуудалд шүүмжлэлтэй хандаж ирлээ. Ардчилал өөрөө шүүмжлэлт сэтгэлгээн дээр суурилдаг. Сануулж хэлэхгүй, ярихгүй бол сайн засаглал ч мөхдөг. Энэ зарчмын дагуу өнөөдрийг хүртэл ажиллаж ирсэн.

Үндсэн хуулийн дагуу хэн ч бай үг, үзэл бодлоо чөлөөтэй илэрхийлж, жагсах эрхтэй. Энэ дагуу би үг, үзэл бодлоо илэрхийлж, Засгийн газрын үйл ажиллагаанд шүүмжлэлтэй хандаж ирсэн. Ингэсний улмаас үргэлжийн дайралт, гүтгэлгийн дор 10 сар ажиллалаа. Төсвийн үеэр ноцтой асуудлуудыг ярьж, Ерөнхийлөгч хориг тавьснаар дэмжигдэж, өнөөдрийн нөхцөл байдалд маш зөв шийдвэр байсан нь нотлогдон, төсөв бага ч атугай буурсан. Гэсэн ч өөрийг маань өвчтэй зовлонтой болгож, үр хүүхэд, гэр бүл рүү маань орж байна. Миний хань, төрсөн ахыг АТГ-аас дуудсан байна.

Улстөрчид, улс төрийн албан тушаал хашиж байгаа хүмүүс угаасаа хөрөнгө орлогоо нотлох үүрэгтэй. Гэтэл 2025 оны тавдугаар сарын 28-ны орой манай гэр бүлийн хүнийг АТГ-аас дуудаж, байцаалт авсан. Маргааш 11.00 цаг гэхэд бүх баримт, нотлох баримтаа цуглуулж ир гэсэн. Хөрөнгө орлогоо нотлохын тулд цаг хугацаа хэрэгтэй. Бидэнд 24 байтугай 12 цаг ч өгөөгүй. Өчигдөр утасдаад "маргааш болгоё, өмгөөлөгч авья" гэсэн боловч хугацаа чинь дууссан гэсэн. Надаас ямар нэгэн баримт нотолгоо аваагүй, өөрөө ирэх шаардлагагүй гэж маш ихээр уурсаж, загнаж дарамталсан. Хөрөнгө орлогоо нотлох боломж олгохгүй байна.

Намайг 50 байр зарсан гэж гомдол гаргасан байна. Гэтэл тийм зүйл байхгүй. Мөнгө угаасан тохиолдол ч байхгүй. Би өнөөдрийг хүртэл төрд өндөр дээд албан тушаал хашиж байгаагүй учраас авлига аваагүй. Надад айх юм байхгүй. Намайг болон ах дүү нар, гэр бүлийг оролдож байгаа нь миний амыг боох хэрэгсэл гэж бодож байна. Зөвхөн над дээр бус бусад улстөрчид дээр ийм арга хэрэглэж дуугүй болгодог. Би гэмт хэрэг үйлдээгүй, намайг яаж ч айлгах гээд нэмэргүй ээ, Ерөнхий сайд Л.Оюун-Эрдэнэд хэлэхэд.

Намайг байр зарж, мөнгө угаасан гэдэг хүнд гэмт хэрэгт гүтгэх нь өөрөө гэмт хэрэг. Энэ гэмт хэрэгт намайг гүтгэлсэн хүн бол н.Оюунцэцэг гэж хүн. Ерөнхий сайдын хүүхдийн төгөлдөр хуурын багш гэх мэдээлэл ирсэн. Тэгэхээр өөрийнхөө хүүхдийн багшаар намайг гүтгэж харлуулаад, хэрэг тохно гэж байхгүй. Монгол Улсад дарангуйлал тогтсоны нэг жишээ. Би тэр хувь байцаагчийн ёс зүйгүй, туршлагагүй байдлыг ойлгож болно. Гэхдээ АТГ, хууль сахиулах байгууллагад итгэх ёстой. Маш харамсалтай байна. Ар гэр рүү нь орж байна, би айхгүй байна. Хэнд хууль яаж үйлчилж байна вэ, харъя. Намайг орлогоо нотлох хоёр хоногийн хугацаа өгсөн. Тэгвэл Ерөнхий сайд орлогоо хэдэн сарын хугацаанд нотлох ёстой юм бэ?