Зам, тээврийн яамнаас 2025 оны тавдугаар сарын сүүлээр хийсэн хэвлэлийн хурлаар “С” зөвшөөрлийн бичиг олгох, ашиглах журамд орж буй өөрчлөлт болон авто зам, тээврийн салбарын цаг үеийн нөхцөл байдалтай холбоотой мэдээлэл өглөө. Хурлыг Автотээврийн бодлого зохицуулалтын газрын дарга Э.Мөнхнасан тэргүүлэн, салбарын холбогдох албан тушаалтнууд оролцлоо.

Хурлын эхэнд авто замын эвдрэл, хөдөлгөөний аюулгүй байдлыг хангах шаардлага, говийн бүсийн замын их болон ээлжит засварын талаар танилцуулав. Зам, тээврийн сайдын өгсөн чиглэлийн дагуу олон улс болон улсын чанартай авто замаар зорчиж буй тээврийн хэрэгслийн даац хэтрүүлэлтийг зогсоох хяналт шалгалт эхлэх тухай зарлалаа.

Э.Мөнхнасан даргын хэлснээр, сүүлийн жилүүдэд уул уурхайн болон шатахуун тээвэрлэж буй зарим тээврийн хэрэгсэл техникийн зөвшөөрөгдөх даацын дээд хэмжээг давуулан тээвэр хийснээс нийтийн хэрэгцээний зам хэт их эвдэрч, засвар үйлчилгээний зардал өсөж байгаа аж. Жишээлбэл, цементийн тээвэрт ашиглагдаж буй зарим тээврийн хэрэгсэл нэг удаад 140 тонн ачаа ачиж, техникийн стандарт зөрчсөн тохиолдол бүртгэгджээ.

Иймээс MNS4598:2025 стандартын дагуу тээврийн хэрэгслийн даац, техникийн нөхцөлд хяналт тавьж, зөрчил илэрсэн тохиолдолд тухайн тээврийн хэрэгслийг хөдөлгөөнд оролцохыг хориглох, түр саатуулах арга хэмжээ авахаар болжээ. Энэ хүрээнд говийн бүсийн чиглэлд хийгдэж буй уул уурхайн тээврийг түр хугацаанд бүрэн зогсоож, хяналт шалгалтыг ирэх долоо хоногийн даваа гарагаас эхлүүлнэ.

Түүнчлэн 2025 онд улсын төсвийн хөрөнгөөр санхүүжих хөрөнгө оруулалтын хүрээнд говийн бүсийн улсын чанартай хоёр чиглэлд авто замын их засвар хийхээр төлөвлөсөн бөгөөд одоогоор эхлээд байна.

Цаашид авто замын хяналтыг сайжруулах зорилгоор дараах арга хэмжээг авна:

• Улсын чанартай авто замуудад 32 төлбөр авах цэг ажиллаж байгаа бөгөөд тэдгээрийн 8 нь цахимжсан, үлдсэн хэсгийг 2025 онд багтаан бүрэн цахимжуулна.

• Тээврийн цагдаагийн албаны ашигладаг 40 хяналтын камерын системийг авто замын хяналтын системтэй нэгтгэж, цэгүүдийг 60 хүртэл нэмэгдүүлнэ.

• Олон улс болон улсын чанартай замд нийт 100 орчим хяналтын камер суурилуулж, даац хэтрүүлэлтийг газар дээр нь илрүүлэн зөрчлийг арилгуулах үйл ажиллагаа явуулна.

Эдгээр арга хэмжээ нь авто замын ачааллыг зохицуулж, эвдрэл гэмтлийг бууруулах, зам тээврийн ослоос урьдчилан сэргийлэх, мөн тээврийн салбарын хариуцлагын тогтолцоог сайжруулах зорилготой юм.

Эх сурвалж: Зам, тээврийн хөгжлийн яам