Улсын Их Хурлын Байгаль орчин, хүнс, хөдөө аж ахуйн байнгын хороо 2025 оны тавдугаар сарын гучинны өдөр хуралдаж, нэг асуудлыг хэлэлцэн шийдвэрлэлээ. Хуралдаанаар Агаарын бохирдол, утааны асуудлаар ерөнхий хяналтын сонсголын бэлтгэлийг хангах, зохион байгуулах үүрэг бүхий ажлын хэсгийн тайланг үндэслэн боловсруулсан “Засгийн газарт чиглэл өгөх тухай” тогтоолын төслийг дахин хэлэлцсэн байна.

Уг тогтоолын төслийг анх 2025 оны дөрөвдүгээр сарын арван тавны өдрийн хуралдаанаар хэлэлцэн дэмжсэн ч хэрэгжих хугацаатай холбоотой өөрчлөлт оруулах шаардлага гарснаар дахин хэлэлцэхээр болсон тухайг Байнгын хорооны дарга Б.Бейсен танилцууллаа. Тодруулбал, тогтоолын хүчин төгөлдөр болох хугацааг тавдугаар сарын нэгнээс зургаадугаар сарын арван тавны өдөр болгон өөрчлөхөөр төсөлд тусгасан байна.

Хуралдаанд оролцсон гишүүдийн зүгээс уг асуудалтай холбоотой асуулт, санал хэлээгүй бөгөөд тогтоолын төслийг Улсын Их Хурлын чуулганы нэгдсэн хуралдаанаар хэлэлцэхийг дэмжих саналын томьёоллоор санал хураалт явуулахад олонх нь дэмжжээ.

Ийнхүү Байнгын хорооноос гаргасан санал, дүгнэлтийг УИХ-ын чуулганы нэгдсэн хуралдаанд танилцуулахаар тогтсон байна.

Эх сурвалж: Улсын Их Хурлын Хэвлэл мэдээллийн газар