Монгол Улсын Их Хурлын дарга Д.Амарбаясгалан “Олон улсын хүүхдийн эрхийг хамгаалах өдөр”-ийг тохиолдуулан 2025 оны тавдугаар сарын гучинны өдөр хүүхдийн эрхийг хамгаалах чиглэлээр ажиллаж буй олон улсын болон төрийн бус байгууллагын төлөөллийг хүлээн авч уулзлаа. Энэхүү уулзалтаар хүүхдийн хөгжил, оролцоо, хамгааллын асуудлыг улс төр, хууль эрх зүйн бодлогын хүрээнд шинэ шатанд гаргах чиглэлээр өргөн хүрээтэй яриа өрнөв.
УИХ-ын дарга уулзалтын эхэнд хүүхдийн эрхийг хамгаалах чиглэлээр Монгол Улс 2016 онд Хүүхэд хамгааллын тухай хуулийг баталсан, харин 2024 онд уг хуулийг шинэчилснээр 2025 оны нэгдүгээр сарын нэгнээс эхлэн бүх сум, хороонд нийгмийн ажилтан ажиллаж эхэлснийг онцлов. Түүнчлэн шинэ парламентын анхны чуулганаар хүний эрхийг дээдэлсэн, хүүхдэд ээлтэй эрх зүйн орчныг бүрдүүлэх стратеги төлөвлөгөө баталсан талаар танилцууллаа.
УИХ хүүхдийн эрүүл мэнд, боловсролын тэгш хүртээмж, цахим орчин дахь аюулгүй байдалд анхаарал хандуулан ажиллаж байгаа бөгөөд “Үдийн хоол” хөтөлбөрийг зөвхөн бага анги бус дунд, ахлах ангийн сурагчдад хүртээмжтэй болгохоор зорьж буйг дурдав. Мөн санхүүгийн боловсролыг дэмжих чиглэлээр ахлах ангийн сурагчдад зориулсан LEVEL-UP хөтөлбөрийг Монголбанк болон бусад холбогдох байгууллагуудтай хамтран хэрэгжүүлж эхэлснийг танилцууллаа.
Хүүхдийн эсрэг цахим хүчирхийлэлтэй тэмцэх чиглэлээр УИХ тусгай ажлын хэсэг байгуулан ажиллаж байгаа бол боловсролын хүртээмжийн тухайд орон нутгийн сургуулиудад техник, технологийн хангамжийг нэмэгдүүлэх ажлыг эрчимжүүлж буйг мөн тодотгов.
Уулзалтын үеэр НҮБ-ын Хүүхдийн сангийн Монгол дахь суурин төлөөлөгч Эваристе Коуасси-Комлан Монгол Улс хүүхдийн эрхийн тухай конвенцод нэгдсэн анхны орнуудын нэг гэдгийг онцолж, шинэ парламентын даргын манлайллыг үнэлж байгаагаа илэрхийлэв. Тэрбээр хүүхдийн эрхийг эхийн хэвлийд байхаас эхлэн хамгаалах хэрэгцээ шаардлагыг дурдаж, “Үдийн хоол” хөтөлбөрийг бүх түвшний сурагчдад хүртээмжтэй болгох санаачилгыг дэмжиж буйгаа илэрхийлсэн. Мөн хот хөдөөгийн боловсролын ялгааг арилгах, англи хэлний чадварыг сайжруулах чиглэлээр хамтын ажиллагаагаа үргэлжлүүлж буйгаа дурдав.
“Дэлхийн зөн” олон улсын байгууллагын үндэсний захирал Б.Болорцэцэг зорилтот бүлгийн хүүхдийн эрх, оролцоог дэмжих чиглэлээр хийж буй ажлаа танилцуулсан бол “Өнөр бүл” төвийн захирал М.Өлзийчимэг бүтэн өнчин хүүхдүүдийн халамж, эцэг эхийн хайхрамжгүй байдлын талаар хөндөж ярив.
Энэхүү уулзалтаар олон улсын болон төрийн бус байгууллагуудын төлөөлөл УИХ-ын шинэ удирдлагын зүгээс хүүхдийн эрхийг хамгаалах, хөгжлийг дэмжихэд гаргаж буй санаачилга, бодлогын шинэчлэлд талархал илэрхийлж, цаашид хамтран ажиллах бэлэн байгаагаа мэдэгдэв.
Эх сурвалж: Улсын Их Хурлын Хэвлэл мэдээллийн газар
