Цөлжилттэй тэмцэх тухай Нэгдсэн Үндэстний Байгууллагын Конвенцын Талуудын бага хурлын арван долоодугаар удаагийн хуралдаан буюу СОР17 нь 2026 оны наймдугаар сарын арван долоон болон хорин наймны хооронд Монгол Улсын нийслэл Улаанбаатар хотод зохион байгуулагдана. Энэ нь дэлхийн хэмжээнд газар, байгаль орчны асуудлыг хэлэлцэх өндөр түвшний томоохон арга хэмжээ болох юм.
Тус хуралд НҮБ-ын Цөлжилттэй тэмцэх Конвенцын 197 гишүүн орны төр, засгийн тэргүүнүүд, сайд нар, олон улсын байгууллагууд, эрдэм шинжилгээний хүрээлэн, иргэний нийгмийн төлөөлөл, хувийн хэвшлийнхэн оролцох төлөвтэй байна. Хоёр долоо хоногийн хугацаанд үргэлжлэх хуралдаанаар цөлжилт, газрын доройтол, ган зэрэг уур амьсгалын өөрчлөлтөөс улбаатай, хүн төрөлхтөнд нөлөөлж буй олон талт сорилтуудын талаарх бодлого, шийдлүүдийг хэлэлцэнэ.
Монгол Улсын 1.56 сая км² нутаг дэвсгэрийн 76.9 хувь нь газрын доройтолд өртөөд буй нь энэ чуулга уулзалтыг Улаанбаатарт зохион байгуулах бодит шалтгаан болоод байна. Монгол Улс цөлжилттэй тэмцэх дэлхийн хамтын хүчийг дэмжиж, тогтвортой газар ашиглалтын бодлогыг хэрэгжүүлэхэд манлайлан оролцож ирсэн бөгөөд энэхүү чуулганаар уг байр сууриа улам бэхжүүлэх юм.
Бага хурлын хүрээнд дараах арга хэмжээнүүд зохион байгуулагдана:
-
Сайд нарын түвшний хэлэлцүүлэг
-
Шинжлэх ухаан ба бодлогын уялдаа, инновац, технологи, санхүүгийн шийдлийг хэлэлцэх форумууд
-
Иргэний нийгэм, олон талт оролцогчдын чуулга уулзалт
Энэ нь зөвхөн байгаль орчны асуудал төдийгүй салбар хоорондын уялдаа холбоог сайжруулах, дэлхий нийтээр газрын доройтлыг тэглэх зорилтод дөхөх чухал алхам болно.
Эх сурвалж: Нэгдсэн Үндэстний Байгууллага, Монгол Улсын Байгаль орчны бодлогын алба
