Монгол Улсын Их Хурлаас 2025 оны тавдугаар сарын 30-ны чуулганаар цахим мөрийтэй тоглоом, бооцоот тоглоом, төлбөрт тааврын үйл ажиллагааг бүхэлд нь хориглох заалтуудыг тусгасан Зөвшөөрлийн тухай хууль, Эрүүгийн хууль, Зөрчлийн тухай хуульд нэмэлт, өөрчлөлт оруулах тухай хуулийн төслийг эцэслэн баталлаа.

Энэхүү хууль санаачлагдах шалтгаан нь сүүлийн жилүүдэд цахим мөрийтэй тоглоомтой холбоотой эдийн засгийн хохирол эрс нэмэгдэж, залилан, мөнгө угаах зэрэг гэмт хэргийн гаралт нэмэгдсэнтэй холбоотой. Үндэсний статистикийн хорооны мэдээлснээр, 2023 онд 200 эдийн засгийн гэмт хэрэг бүртгэгдсэн бол 2024 онд учирсан хохирлын хэмжээ 417.2 тэрбум төгрөгт хүрээд байна.

Түүнчлэн олон улсын мөрийтэй тоглоомын 1XBET гэх сайтаар дамжин Монгол Улсаас 1.7 их наяд төгрөг буюу 500 сая ам.доллар гадаад улсууд руу 110 гаруй “агент”-аар дамжин шилжсэн нь эдийн засгийн аюулгүй байдалд ноцтой эрсдэл учруулж байгааг баримтаар нотолсон юм.

Хуулийн өөрчлөлтөөр дараах зохицуулалтууд хэрэгжих боломжтой болж байна:

• Эрүүгийн хуульд зааснаар цахим мөрийтэй тоглоом, бооцоот тоглоом, төлбөрт тааврыг зохион байгуулсан этгээд, мөн түүнийг дэмжин өөрийн данс, цахим мөнгө, утасны дугаар, цахим хаяг ашиглуулсан “агент”-уудад эрүүгийн хариуцлага тооцно.

• Зөрчлийн тухай хуульд орсон өөрчлөлтөөр төлбөрт таавар, бооцоот тоглоомыг сурталчилсан, хүүхэд, залуучуудыг уруу татсан тохиолдолд зөрчлийн хариуцлага оногдуулах эрх зүйн үндэс бүрдлээ.

Хууль батлагдсанаар гарах гол үр дүн:

• Монгол Улсын валютын гадагш урсгалыг хязгаарлаж, эдийн засгийн аюулгүй байдлыг хангана. (Өнгөрсөн хугацаанд Монголын гадаад валютын нөөцийн 10 хувьд дүйцэх хэмжээний валют хяналтгүй гадагш гарсан гэх тооцоо бий)

• Мөнгө угаах, хууль бус орлого нуун дарагдуулах, оффшор руу хөрөнгө шилжүүлэх зэрэг хууль бус үйлдлийг таслан зогсоох нөхцөл бүрдэнэ.

• Хүүхэд, залуусыг сэтгэл зүйн болон эдийн засгийн донтох эрсдэлээс урьдчилан сэргийлэх, эрүүл мэнд, амь насыг хамгаалах нөхцөл бүрдэнэ.

• Цахим гэмт хэрэг, луйврын золиос болох эрсдэлийг бууруулж, иргэдийн амьдралыг санхүүгийн эрсдэлээс хамгаална.

Энэхүү хууль батлагдсанаар цахим орчны хяналт, гэмт хэргээс урьдчилан сэргийлэх, санхүүгийн найдвартай байдлыг бэхжүүлэх чиглэлд томоохон алхам болж байгаа юм.

Эх сурвалж: Монгол Улсын Их Хурал, ҮСХ