Авлигатай тэмцэх газрын Урьдчилан сэргийлэх, соён гэгээрүүлэх хэлтэс 2025 оны тавдугаар сарын 19-23-ны өдрүүдэд авлигын шалтгаан, нөхцөлийг арилгах, таслан зогсоох, ил тод, нээлттэй байдлыг сайжруулах чиглэлд чиглэсэн хамтын ажиллагаа өрнүүллээ.

Тус хэлтэс энэ хугацаанд Хөдөлмөр, халамжийн үйлчилгээний ерөнхий газар, Соёл, урлагийн газар, Чингэлтэй дүүргийн Татварын хэлтэс, Нийгмийн даатгалын хэлтэс, Улсын хоёрдугаар төв эмнэлэг, “Улаанбаатар төмөр зам” ХНН, Байгаль орчны судалгаа, шинжилгээний төв, “Геологи, судалгаа шинжилгээний төв” ТӨҮГ зэрэг байгууллагуудтай хамтран ажиллаж, үйл ажиллагаанд нь авлигын эрсдэлийн дүн шинжилгээ хийсэн байна.

Мөн Иргэний нисэхийн үндэсний төв ТӨХХК, Батлан хамгаалах яамны харьяа “Бөртэ” ТӨААТҮГ, Гадаад харилцааны яам зэрэг байгууллагуудад авлигын эрсдэлийг бууруулах, шалтгаан нөхцөлийг арилгах тухай зөвлөмжийг хүргүүлсэн байна.

Хамгийн их анхаарал татаж буй асуудлын нэг бол төрийн байгууллагын үйлчилгээ үзүүлэх явцад хүнд суртал, чирэгдэл үүсэх боломж, авлига болон ашиг сонирхлын зөрчлийн эрсдэлийг тодорхойлох ажил байсан бөгөөд энэ хүрээнд нийт 8 дүрэм, журам, шийдвэрт дүн шинжилгээ хийж, сайжруулах шаардлагатай зүйлсийг хянан үзжээ.

Авлигын эсрэг мэдлэг ойлголтыг түгээх зорилгоор өнгөрсөн долоо хоногт зохион байгуулсан сургалтад нийт 17 байгууллагын 1008 албан тушаалтан хамрагдсан байна. Тус сургалтаар хууль эрх зүйн мэдлэг, авлигаас урьдчилан сэргийлэх арга замууд, ил тод байдлыг хэрхэн хангах тухай ойлголтыг түгээж, байгууллагуудын дотоод хяналт, ёс зүйн тогтолцоог сайжруулахад чиглэсэн мэдээлэл өгчээ.

Эх сурвалж: Авлигатай тэмцэх газар