Завхан аймгийн Улиастай, Тосонцэнгэл суманд Оросын Холбооны Улсын Бүгд Найрамдах Тува Улсын өдрүүдийн хүрээнд хоёр талын хамтын ажиллагааг гүнзгийрүүлэх олон талт уулзалт, хэлэлцээрүүд болж өндөрлөлөө. Тува Улсаас 140 гаруй бизнес эрхлэгч, төрийн болон хувийн хэвшлийн төлөөлөгчид Завханд хүрэлцэн ирсэн нь хоёр бүс нутгийн харилцаанд чухал ахиц дэвшил авчирсан үйл явдал байлаа.

Завхан аймгийн Засаг дарга Г.Өнөрбаяр, Кызыл хотод суугаа Монгол Улсын консул Л.Энхболд болон Тува Улсын төр, хувийн хэвшлийн удирдлагуудын хамтарсан уулзалтаар хоёр орны бүс нутгийн хамтын ажиллагааг өргөжүүлэх, түүний дотор аялал жуулчлал, мах боловсруулах үйлдвэрлэл, хилийн боомтын дэд бүтцийг хөгжүүлэх талаар онцгойлон ярилцав. Тувагийн Соёлын дэд сайд Бижик Айлана Алексеевна тэргүүтэй төлөөлөгчид уулзалтад оролцож, хамтын ажиллагааны чиглэлүүдийг тодорхойлсон юм.

Цаашид Арц суурь хилийн боомтыг шатахуун экспортлох чиглэлээр Оросын талын албан ёсны боомтуудын жагсаалтад оруулах хүсэлтийг Завхан аймаг холбогдох төв байгууллагуудад хүргүүлсэн бөгөөд эерэг хариу ирэхийг хүлээж байна. Үүнтэй зэрэгцэн тус боомтоор дамжуулан хоёр улсын жижиг, дунд бизнес эрхлэгчдийн бараа бүтээгдэхүүн, тэр дундаа брэнд болсон бүтээгдэхүүнийг харилцан нийлүүлэх, сурталчлах боломж нэмэгдэх юм.

Арц суурь боомтоос аймгийн төв хүртэлх 159.5 км хатуу хучилттай замын төсөл эхэлсэн нь эдийн засаг, худалдаа, аялал жуулчлалын салбарт урьд өмнө байгаагүй боломжуудыг нээж буйг хоёр тал онцлон тэмдэглэжээ. Мөн Завхан аймаг, Тувагийн хамтын ажиллагааг хөдөө аж ахуй, боловсрол, соёл урлаг, эрүүл мэндийн салбаруудад гүнзгийрүүлэн хөгжүүлэхээр тохиролцсон нь бүс нутгийн түншлэлийг илүү бодитой, тогтвортой болгох алхам хэмээн талууд дүгнэв.

Хамтын ажиллагааны энэ шинэ шат нь олон жилийн турш яригдаж ирсэн санаачилгуудыг хэрэгжүүлж, Төв Азийн хоёр хөршийн бүс нутгийн хөгжлийг уялдуулах суурь болохоор байна.

Эх сурвалж: Завхан аймгийн ЗДТГ