Улсын Их Хурлын 2025 оны тавдугаар сарын 30-ны өдрийн нэгдсэн хуралдаан өнөөдөр “Их хуралдай” танхимд хоёр үе шаттайгаар зохион байгуулагдана.

Өглөөний 10:00 цагаас эхлэх хуралдаанаар Байгаль орчинд нөлөөлөх байдлын үнэлгээний тухай хуульд нэмэлт, өөрчлөлт оруулах тухай хуулийн төслийг хэлэлцэх эсэхийг шийдвэрлэнэ. Уг хуулийн төслийг Засгийн газар 2025 оны тавдугаар сарын 16-нд өргөн мэдүүлсэн бөгөөд байгаль орчны үнэлгээний хууль, зохицуулалтын орчныг шинэчлэх шаардлагатай талаар өмнө нь ярьж байсан юм.

Үдээс хойших хуралдаан 14:00 цагаас эхэлж, Монгол Улсын Ерөнхий сайд боловсролын салбарын санхүүжилт, хөрөнгө оруулалтыг нэмэгдүүлэх, хүүхэд бүрд тэгш боловсрол эзэмших боломж бүрдүүлэх чиглэлээр авч хэрэгжүүлж буй үйл ажиллагааны талаарх мэдээлэл хийнэ.

Мөн энэ үеэр Байгаль орчин, хүнс, хөдөө аж ахуйн байнгын хорооны санал, дүгнэлтэд үндэслэн агаарын бохирдол, утааны асуудлаар зохион байгуулах ерөнхий хяналтын сонсголын бэлтгэл ажлын тайланг танилцуулах бөгөөд “Засгийн газарт чиглэл өгөх тухай” Улсын Их Хурлын тогтоолын төслийг хэлэлцэхээр төлөвлөсөн байна.

Хуралдаан ийнхүү байгаль орчны тулгамдсан асуудал, боловсролын салбарын санхүүжилтийн бодлого, төрийн хяналтын зохицуулалтын хүрээнд өрнөхөөр байгаа юм.

Эх сурвалж: Улсын Их Хурлын Хэвлэл мэдээллийн алба