Монгол Улсын Их Хурлын дарга Д.Амарбаясгалан 2025 оны тавдугаар сарын 29-ний өдөр “Огцрох амархан” жагсаалын төлөөлөлтэй Төрийн ордонд уулзалт хийлээ. Уулзалтад УИХ-ын гишүүн Ж.Бат-Эрдэнэ, Б.Батбаатар, Б.Жаргалан, Г.Уянгахишиг, П.Сайнзориг, Д.Пүрэвдаваа, УИХ-ын Ерөнхий нарийн бичгийн дарга Б.Баасандорж нар оролцсон байна.
УИХ-ын дарга уулзалтын эхэнд иргэдийн дуу хоолойг хүндэтгэж буйгаа илэрхийлж, олон намын төлөөлөл бүхий 126 гишүүнтэй шинэ парламент нээлттэй, олон ургальч байр суурь баримтлан ажиллаж байгааг онцлов. Тэрбээр анх удаа сонгогдсон олон гишүүнтэй парламент аливаа асуудлыг хуульд заасан журмын дагуу ил тод хэлэлцэнэ гэдгийг тодотголоо.
Жагсагчдын төлөөлөл шударга ёсны зарчмаар гарч ирсэн Ерөнхий сайдын талаар үүссэн бухимдлаас үүдэн залуус жагсаал хийж эхэлсэн хэмээгээд, УИХ-д хандаж уулзах хүсэлтээ илэрхийлж, энэ хүсэлтийг хүлээн авсанд талархал илэрхийлсэн юм.
Тэд дараах гурван үндсэн шаардлагыг тавьжээ:
-
Ерөнхий сайд хариуцлага хүлээж, огцрох
-
Эвслийн Засгийн газрыг дэмжихгүй
-
Үндсэн хуулийн аливаа өөрчлөлтийг эсэргүүцэж байгаа
Мөн парламент сөрөг хүчинтэй, хяналттай байх ёстой гэсэн байр суурийг илэрхийлэв.
Үүнд хариу өгсөн УИХ-ын дарга Д.Амарбаясгалан хяналтын тогтолцоог сайжруулахын төлөө байгаагаа илэрхийлж, Ерөнхий сайдаас өргөн барьсан УИХ-ын тогтоолын төслийг хэлэлцэх хууль зүйн процесс эхэлснийг дурдсан байна. Байнгын хороо уг төслийг ирэх Даваа гарагт хэлэлцэж эхэлж, ирэх Пүрэв гарагт УИХ-ын чуулганы нэгдсэн хуралдаанаар хэлэлцэхээр төлөвлөжээ. Мөн УИХ-ын 126 гишүүн шаардлагуудыг хуралдааны үеэр авч үзэж, хариулт өгөх боломжтой гэдгийг онцолсон байна.
Жагсагчдын зүгээс сонгосон парламент нь өөрсдийнх нь дуу хоолойг сонсож, хуульд заасан журмын дагуу мэдээлэл өгч буй нь УИХ-д итгэх итгэлийг нэмэгдүүлж буйг онцолсон гэж Улсын Их Хурлын Хэвлэл мэдээллийн газар мэдээллээ.
Эх сурвалж: Улсын Их Хурлын Хэвлэл мэдээллийн алба
