Улсын Их Хурлын 2025 оны хаврын ээлжит чуулганы өнөөдрийн үдээс өмнөх нэгдсэн хуралдаан 10 цаг 02 минутад эхэлж, улс орны эдийн засгийн ирэх онуудын бодлого, төлөвлөлттэй холбоотой хоёр чухал асуудлыг хэлэлцэн шийдвэрлэлээ.
Эхлээд Засгийн газраас 2025 оны дөрөвдүгээр сарын 30-нд өргөн мэдүүлсэн Монгол Улсын нэгдсэн төсвийн 2026 оны төсвийн хүрээний мэдэгдэл, 2027-2028 оны төсвийн төсөөллийн тухай хуулийн төсөл болон хамт өргөн барьсан “Засгийн газрын өрийн удирдлагын 2026-2028 оны стратегийн баримт бичиг батлах тухай” тогтоолын төслийг хэлэлцэв. Төсвийн байнгын хорооны танилцуулгыг УИХ-ын гишүүн Г.Тэмүүлэн хийж, зарчмын зөрүүтэй нэг саналаар санал хураахад олонхийн дэмжлэг авсныг онцлов.
Хуулийн төсөлд 2026 оны ДНБ-ний өсөлтийг 6.0 хувь, 2027-2028 онд 6.5 хувь байхаар, инфляцыг 2026 онд 7.0 хувь, 2027 онд 6.4 хувь, 2028 онд 6.0 хувьд хүргэхээр тусгасан. Засгийн газрын өрийн ДНБ-д эзлэх хувь хэмжээг 2026 онд 50 хувь, 2027-2028 онд 45 хувьтай байхаар төлөвлөжээ. Хэлэлцүүлгийн үеэр УИХ-ын гишүүд эдийн засгийн өсөлт, төсвийн зарлагын бүтэц, эрчим хүчний салбарын хөрөнгө оруулалт зэрэг асуудлаар асуулт асууж, шүүмжлэлтэй хандав. Төсвийн тогтвортой байдлын зөвлөлөөс 2025 оны эдийн засгийн өсөлтийг 5.5 хувь гэж тооцоолж буй нь Засгийн газрын 8.0 хувийн төсөөллөөс зөрүүтэй байгааг тэмдэглэлээ.
Хоёр дахь хэлэлцүүлгээр “Монгол Улсын хөгжлийн 2026 оны төлөвлөгөө батлах тухай” УИХ-ын тогтоолын төслийг хэлэлцэв. Эдийн засгийн байнгын хорооны санал, дүгнэлтийг УИХ-ын гишүүн М.Бадамсүрэн танилцуулж, зарчмын зөрүүтэй нэг саналын томьёоллоор санал хураалт явуулахад олонхын дэмжлэг авсан байна. Үүний дараа уг тогтоолын төслийг батлах санал хураалт явагдаж, хуралдаанд оролцсон гишүүдийн 67.9 хувь нь дэмжсэнээр батлагдав.
Ийнхүү 2026 оны төсвийн хүрээний мэдэгдэл, Засгийн газрын өрийн стратеги болон улсын хөгжлийн төлөвлөгөөг УИХ хэлэлцэн, батлах шатанд шилжүүлж байна. Ирэх онуудын эдийн засгийн бодлого, санхүүгийн тогтвортой байдлыг хангахад чухал нөлөө үзүүлэх эдгээр баримт бичгийг Төсвийн байнгын хороо болон бусад холбогдох байгууллагууд цаашид бэлтгэж, хэрэгжүүлэхээр ажиллаж байна.
Эх сурвалж: Улсын Их Хурлын Хэвлэл мэдээллийн алба
