“2025 оны Сувон ITS /тээврийн ухаалаг систем/ Ази, Номхон далайн бүсийн ерөнхий хурал” БНСУ-ын Сувон хотод энэ сарын 28-наас 30-ны хооронд болж байна. “ITS-ээр хэт холбосон хотууд” уриан дор зохион байгуулагдаж буй тус хуралд Ази, Номхон далайн бүс нутгийн 30 гаруй орон оролцож байна. Малайз, Балба, Вьетнам зэрэг 12 улсын дэд сайд нар тээврийн ухаалаг системд тулгуурласан дижитал өөрчлөлт, хот хоорондын холболтын алсын хараагаа танилцуулсан байна.

Хурлын гол зорилго нь тээврийн ухаалаг систем буюу ITS-ийн хөгжлийн талаар хамгийн сүүлийн үеийн мэдээллийг шууд эх сурвалжаас солилцох, хамтын ажиллагааны шинэ боломжийг эрэлхийлэхэд оршиж байна. Улс орнуудын мэргэжилтнүүд туршлага, мэдлэгээ хуваалцан, шинэ бодлогын санаачилга, судалгааны үр дүнгээ танилцуулж буй энэ хурлын чухал нэг үйл явдал нь Монгол Улсын ЗТЯ-ны Төрийн нарийн бичгийн дарга С.Батболдын тавьсан хоёр шинэ санал байв.

Тэрбээр Азийн болон дэлхийн ITS хөгжлийн чиг хандлага, бодлого, стратегийн хүрээнд Монгол Улсаас дараах хоёр санаачилгыг дэвшүүлсэн байна. Нэгдүгээрт, бүс нутгийн хэмжээнд тээврийн ухаалаг системд суурилсан даатгалын нэгдсэн систем бий болгох, хоёрдугаарт, олон улсын тээвэр, логистикийн нэгдсэн платформыг Ази, Номхон далайн бүсэд хэрэгжүүлэх тухай хэлэлцүүлжээ. Эдгээр санаачилгыг хуралд оролцсон орнууд дэмжиж, цаашид хамтран ажиллахаа илэрхийлсэн талаар ЗТЯ мэдээлэв.