Монгол Улсын Гадаад харилцааны яам болон БНХАУ-ын Шинжаан Уйгарын Өөртөө Засах Орны Ардын Засгийн газар хоорондын хамтын ажиллагааны ажлын хэсгийн гурав дахь хуралдаан энэ оны тавдугаар сарын 28-нд Улаанбаатар хотод амжилттай болж өндөрлөлөө.

Хуралдааны үеэр хоёр тал хилийн боомтын үйл ажиллагаа, зам тээвэр, дэд бүтцийн бүтээн байгуулалт, эрчим хүч, хөдөө аж ахуй, боловсрол, аялал жуулчлал, хүмүүнлэгийн харилцаа зэрэг олон салбарт өрнөж буй хамтын ажиллагааны талаар санал солилцож, ирээдүйд хэрэгжүүлэх боломжит чиглэлүүдийн талаар хэлэлцэв. Талууд Монгол, Хятадын хөгжлийн төлөвлөгөөг уялдуулж, иргэдийн амьдралын чанарыг сайжруулахад чиглэсэн бодит хамтын ажиллагааг дэмжих байр сууринд нэгдлээ.

Хамгийн онцлох чиглэлүүдийн нэг нь баруун бүсийг “эрчим хүчний төрөлжсөн бүс болон байгалийн аялал жуулчлалын дэд бүс” болгон хөгжүүлэх Монгол Улсын Засгийн газрын зорилтыг хэрэгжүүлэхэд ШУӨЗО-тай идэвхтэй хамтрах тухай байв. Үүнд сэргээгдэх эрчим хүч болон хил орчмын аялал жуулчлалын төслүүд чухал үүрэгтэй байх бөгөөд хоёр тал эдгээр чиглэлд үр өгөөжтэй хамтран ажиллах механизм бүрдүүлэхээр тохиролцов.

Хуралдааныг монголын талаас Гадаад харилцааны яамны Төрийн нарийн бичгийн дарга Л.Мөнхтүшиг, хятадын талаас ШУӨЗО-ы Ардын Засгийн газрын дэд тэргүүлэгч Жу Лифань нар даргалж, баруун бүсийн таван аймгийн удирдлагууд болон хөдөө аж ахуй, эрүүл мэнд, боловсрол, тээвэр ложистик, хил хамгаалалтын байгууллагын төлөөлөгчид оролцсон байна.

Хуралдааны үр дүнд тохиролцсон асуудлуудыг албажуулсан протоколд хоёр тал гарын үсэг зуржээ.

Эх сурвалж: Гадаад харилцааны яам