Монгол Улсад Төрийн албаны зөвлөл үүсэн байгуулагдсаны 30 жилийн ойг тохиолдуулан НЗДТГ болон нийслэлийн Төрийн албаны салбар зөвлөл хамтран “Бүсчилсэн хөгжил–Төрийн албаны манлайлал” зөвлөгөөнийг нийслэлд зохион байгуулж байна. Энэ зөвлөгөөнд нийслэлийн төрийн захиргааны болон төрийн үйлчилгээний салбарын 1200 гаруй албан хаагч оролцож, бодлого, практикийн түвшинд сургалт, хэлэлцүүлэг өрнүүлэн, сайн туршлагаа солилцлоо.

Төрийн албанд өнөөдрийн байдлаар улсын хэмжээнд 226 мянга гаруй албан хаагч ажиллаж байгаа бол зөвхөн нийслэлд энэхүү бүсчилсэн зөвлөгөөн болж байгаагаараа онцлог байв. Зөвлөгөөний хүрээнд төрийн албан хаагчдын тулгамдаж буй асуудал, хууль тогтоомжийн шинэчлэл, ёс зүйн хэм хэмжээ, шатлан дэвших боломж, карьер хөгжил зэрэг сэдвээр цогц хэлэлцүүлэг өрнөсөн юм.

НЗДТГ-ын дарга Д.Амгалан “Төрийн албан хаагчдын цаашдын хөгжлийн зорилго, зорилтыг тодорхойлох бодлогын шинжтэй зөвлөгөөн болж байна” хэмээн онцолсон бол Төрийн албаны зөвлөлийн дарга П.Цэдэвсүрэн эмэгтэй албан хаагчдын 64.3 хувийн төлөөллийг онцолж, тэдний хөгжил дэвшлийг дэмжих чиглэлд анхаарна гэдгээ илэрхийллээ.

Мөн ЗГХЭГ-ын Хүний нөөцийн газрын дарга П.Сарангэрэл “Ёс зүйн тухай хууль тогтоомжийн хэрэглээ” сэдвийн хүрээнд сургалт, хэлэлцүүлэг хийж, хуульд оруулах өөрчлөлтийн талаар оролцогчдоос санал авч буйг мэдэгдсэн байна.

Төрийн албаны зөвлөлийн гишүүн Д.Баатарсайхан хэлэхдээ, “Бүсчилсэн зөвлөгөөний хүрээнд ЕБС-ийн 300 гаруй ахлах ангийн сурагчдыг хамруулсан “Төрийн алба – Бидний ирээдүй” уулзалтыг зохион байгуулсан. Энэ нь ирээдүйн төрийн албан хаагч болох хүсэлтэй хүүхдүүдэд мэдлэг, ойлголт өгөх зорилготой байлаа” гэлээ.

Зөвлөгөөний дүнд төрийн албан хаагчдын хөгжлийн хэтийн төлөв, шинэчлэлийн суурь ойлголт, олон нийтийн оролцоонд тулгуурласан төрийн манлайллын хэлбэрүүд тодорхойлогдож байна.

Эх сурвалж: Төрийн албаны зөвлөл, НЗДТГ