УИХ-ын гишүүн, Монгол-Туркийн парламентын бүлгийн дарга С.Зулпхар, бүлгийн гишүүн Д.Бум-Очир нар өнөөдөр Бүгд Найрамдах Турк Улсаас Монгол Улсад суугаа Элчин сайд Башак Гэнч Юксэлтэй уулзлаа.

Уулзалтын үеэр С.Зулпхар Элчин сайдад баяр хүргэж, хоёр орны стратегийн түншлэлийг шинэ шатанд гаргах үйл хэрэгт амжилт хүслээ. Тэрбээр хоёр улсын улс төр, эдийн засаг, боловсрол, соёлын хамтын ажиллагаанд парламент хоорондын харилцаа чухал үүрэгтэйг онцлон тэмдэглэв. Монгол, Турк хоёр улс дипломат харилцаа тогтоосны 55 жилийн ойг тохиолдуулан Ерөнхийлөгч У.Хүрэлсүхийн айлчлалаар “иж бүрэн түншлэл”-ээс “стратегийн түншлэл” рүү дэвшин, худалдаа, эдийн засгийн хамтын ажиллагааг гүнзгийрүүлэх зорилтыг тавьсныг дурдлаа.

Элчин сайд Башак Гэнч Юксэл харилцааны шинэ шат эхэлж байгааг онцолж, түүх, соёлын нийтлэг үнэт зүйлтэй хоёр орны хувьд эдийн засгийн хамтын ажиллагааг төрөлжүүлэн хөгжүүлэх бүрэн боломжтойг илэрхийллээ. Туркийн бизнес эрхлэгчид Монголын зах зээлд хамтран ажиллах сонирхлоо улам бүр нэмэгдүүлж байгаа аж.

Уулзалтын үеэр Туркийн хамтын ажиллагаа, зохицуулах агентлаг TIKA Монголд 30 жилийн хугацаанд 870 гаруй төсөл хэрэгжүүлж, 50 сая ам.долларын дэмжлэг үзүүлсэн талаар дурдсан бөгөөд энэ нь хоёр орны хөгжлийн түншлэлд бодит хувь нэмэр оруулсан гэж үнэлжээ. Түүнчлэн Турк улсын тэтгэлгээр 2500 монгол оюутан сурч, мэргэжлээрээ эх орондоо ажиллаж байгаа нь иргэд хоорондын найрамдлыг гүнзгийрүүлж байгааг онцолсон байна.

Д.Бум-Очир гишүүн боловсрол, археологи, соёлын салбарын хамтын ажиллагааг шат ахиулах бодит санал санаачилгуудыг хэрэгжүүлэх чиглэлээр хэлэлцсэн бөгөөд хоёр тал парламент хоорондын харилцаа бол стратегийн түншлэлийн тулгуур гэдэгт санал нэгджээ.

Эх сурвалж: УИХ-ын Хэвлэл мэдээллийн газар