Монгол Улсын Ерөнхийлөгч Ухнаагийн Хүрэлсүхийн урилгаар хүрэлцэн ирсэн Бүгд Найрамдах Австри Улсын Ерөнхийлөгч Александр Ван дер Беллений Монгол Улсад хийсэн төрийн айлчлал амжилттай өндөрлөлөө. Энэхүү айлчлал нь хоёр улс дипломат харилцаа тогтоосны 62 жилийн дараа Австрийн төрийн тэргүүн анх удаа Монголд айлчилж буй онцлог үйл явдал боллоо.

Айлчлалын хүрээнд хоёр улсын төрийн тэргүүн нар албан ёсны хэлэлцээ хийж, ардчилал, хүний эрх, хууль дээдлэх нийтлэг үнэт зүйлсэд суурилсан харилцаагаа гүнзгийрүүлж, улс төр, эдийн засаг, боловсрол, шинжлэх ухаан зэрэг олон салбарт хамтын ажиллагаагаа өргөжүүлэхээр тохиролцлоо.

Талууд хамтран “Монгол-Австрийн хамтарсан тунхаглал” гаргаж, цаашдын стратегийн түншлэлийн үндэс суурийг тавив. Айлчлалын үеэр Засгийн газар болон байгууллага хоорондын 10 баримт бичигт гарын үсэг зурсан бөгөөд үүнд:

• “Нийгмийн хамгааллын тухай хэлэлцээр” – хоёр улсын иргэдийн тэтгэвэр, нийгмийн даатгалын эрхийг харилцан хүлээн зөвшөөрөх эрх зүйн үндэс бүрдүүлсэн,

• Санхүүгийн өмнөх хэлэлцээрүүдийг үргэлжлүүлж, эрүүл мэнд, боловсролын салбарын хөрөнгө оруулалтыг нэмэгдүүлэх зэрэг багтаж байна.

Мөн уул уурхай, инновац, эрчим хүч, ашигт малтмал, кибер аюулгүй байдал, шинжлэх ухаан, соёл, урлаг зэрэг салбарт хамтын ажиллагааг гүнзгийрүүлэхээр талууд тохиролцсон юм.

Айлчлалын хүрээнд болсон бизнесийн дугуй ширээний уулзалтад Монголын талаас 80 орчим аж ахуйн нэгж, Австрийн 7 салбарын 22 компанийн төлөөлөгч оролцсон бөгөөд хөнгөн үйлдвэр, хүнс, эрүүл мэнд, ногоон технологи, төмөр зам, барилгын салбарын хамтын ажиллагааг эхлүүлэх боломжийг ярилцжээ. Энэ нь Австриас хөрөнгө оруулалт татах, Монголын бүтээгдэхүүнийг экспортлох шинэ гарц нээж өгч байна.

Австрийн Ерөнхийлөгчийг Чингис хаан олон улсын нисэх онгоцны буудлаас Гадаад харилцааны сайд Б.Батцэцэг, Австриас Монгол Улсад хавсран суугаа Элчин сайд Андреас Рийкен, бусад албаны төлөөлөгчид үдэж гаргалаа.

Эх сурвалж: Монгол Улсын Ерөнхийлөгчийн Тамгын газар