Нийслэлийн Засаг даргын Тамгын газар болон Авлигатай тэмцэх газар хамтран авлигын эсрэг нийгмийн ухамсар, соён гэгээрүүлэх зорилготой “Иргэн төвтэй соён гэгээрүүлэх өдөрлөг”-ийг 2025 оны тавдугаар сарын 24-нд Д.Сүхбаатарын талбайд зохион байгууллаа.

Өдөрлөгийн гол зорилго нь олон нийтэд авлигын нийгмийн хор хөнөөлийг ухуулан таниулах, шударга ёсны үзэл санааг төлөвшүүлэх, иргэдийг авлигыг үл тэвчих хандлагад уриалах, Авлигатай тэмцэх газрын үйл ажиллагааг сурталчлан таниулах, мэдээлэл, зөвлөгөө хүргэхэд чиглэжээ.

Үйл ажиллагааны хүрээнд:

• “Шударга ёс: Сэтгэхүй хөгжүүлэх бодлого” ном – 500 ширхэг

• “Сургамжит өгүүллэг” ном – 1000 ширхэг

• “Иргэн та авлигын эсрэг юу хийж чадах вэ?” нугалбар – 1000 ширхэг

• “Авлигатай тэмцэх газарт хэрхэн өргөдөл, гомдол, мэдээлэл гаргах вэ?” нугалбар – 1000 ширхэг

эдгээр хэвлэл мэдээллийг иргэдэд тарааж, тэдэнд зөвлөгөө, мэдээлэл хүргэсэн байна.

Мөн өдөрлөгийн хүрээнд хүүхэд, залуучуудын дунд “Шударга байх хамгийн гоё” нэртэй гэр бүлийн хөгжөөнт тоглоом зохион байгуулж, 300 гаруй хүүхдэд шударга ёсны талаарх зургуудыг сонгуулж, нүүрэн дээр нь зураг зурж өгсөн байна. Үүнээс гадна иргэдийн дунд “АХА” тэмцээн зохион байгуулж, гурван хүнд шагнал гардуулсан бол гар зургийн уралдаанд түрүүлсэн долоон хүүхдэд дурсгалын зүйл гардуулсан талаар НЗДТГ мэдээлжээ.

Эх сурвалж: НЗДТГ