Нийслэлийн Засаг даргын Тамгын газраас шинээр байгуулагдах Хүннү хотын бүтээн байгуулалтын хүрээнд тээвэр, логистикийн нэгдсэн төв байгуулах асуудлаар барилгын материал, тоног төхөөрөмжийн ханган нийлүүлэлтийн чиглэлээр үйл ажиллагаа явуулдаг аж ахуйн нэгж, байгууллага, холбоодын төлөөлөлтэй уулзалт зохион байгуулж, санал солилцлоо.

Одоогийн байдлаар Монгол Улс барилгын материалынхаа 70 хувийг импортоор авдаг бөгөөд 2025-2028 онд нийслэлд хэрэгжих томоохон төслүүдийн хэрэгжилттэй холбоотойгоор энэ хэрэгцээ хоёр дахин, зарим тохиолдолд гурав дахин нэмэгдэх төлөвтэй байна. Үүний зэрэгцээ тээвэр, логистикийн саатал, нийлүүлэлтийн гинжин хэлхээний тасалдал зэрэг эрсдэлүүд нэмэгдэх хандлагатай байна.

Энэ нөхцөл байдлыг харгалзан, Барилгын Үндэсний Ассоциаци, Барилгын ханган нийлүүлэгчдийн зөвлөлтэй хамтран Хүннү хотод барилгын материалын логистикийн төв байгуулах асуудлаар хэлэлцэж, төр, хувийн хэвшлийн түншлэлийн хүрээнд хамтарч ажиллахаар зорьж байна.

Хүннү хотын Захирагчийн чиг үүргийг хэрэгжүүлэгч, Засгийн газрын бүрэн эрхт төлөөлөгч М.Батбаяр уулзалтын үеэр хэлэхдээ:
“Хүннү хотын үндсэн чиг үүргийн нэг нь тээвэр логистикийн төвийг байгуулах. Энэ хүрээнд Багахангай–Хүннү хотын чиглэлийн салбар төмөр замын ажил нэг сарын өмнөөс эхэлсэн. Цаашид барилгын материалын нийлүүлэлтийн үйл ажиллагааг цогц байдлаар төлөвлөж, бүтээн байгуулалтад хувийн хэвшлийг өргөнөөр оролцуулах шаардлагатай” гэж онцоллоо.

Хөшигийн хөндийн олон улсын нисэх буудлыг түшиглэн байгуулж буй анхны дагуул хот болох Хүннү хотын хөгжлийн төлөвлөлт нь Улаанбаатар хотын төвлөрлийг сааруулах, барилгын нийлүүлэлтийн өртгийг бууруулах, логистикийн оновчтой сүлжээ байгуулах зэрэг олон талын үр өгөөжтэй гэж салбарын төлөөллүүд дүгнэж байна.

Эх сурвалж: НЗДТГ, Хүннү хотын Захирагчийн алба