2025 онд батлан хамгаалах салбарын хэмжээнд нийт 60 автомашинаар техник хангалтын парк шинэчлэл хийж байгаа бөгөөд өнөөдөр буюу тавдугаар сарын 27-нд Батлан хамгаалах яамны харьяа байгууллага болон цэргийн ангийн төлөөлөлд “Suzuki Jimny” маркийн 18 автомашин хүлээлгэн өглөө. Энэ нь сүүлийн арван гаруй жилийн хугацаанд техникийн шинэчлэл огт хийгдээгүй байсан салбарт хийгдэж буй томоохон ахиц юм.

Парк шинэчлэлийн хүрээнд гуравдугаар сард энхийг сахиулагчдын техник хэрэгслийг 22 автомашинаар, тавдугаар сарын 26-нд “Ниссан Навара” маркийн 20 автомашинаар тус тус шинэчлэн, цэргийн ангиудын төлөөлөлд гардуулжээ. Ийнхүү 60 автомашинаар хангаж, салбарын техникийн бэлэн байдлыг эрс сайжруулсан байна.

Батлан хамгаалах салбарын бодлогын хүрээнд зөвхөн техник шинэчлэл бус, хүний нөөцийн хөгжлийг ч анхаарч буйг онцолж болох юм. Тухайлбал, 20 жилийн дараа “албан ажлын онцгой нөхцөлийн нэмэгдэл олгох журам”-ыг шинэчлэн баталсан бол, хугацаат цэргийн алба хаагчдын сургалтын хөтөлбөрийг 2025 онд шинэчлэн боловсруулжээ.

Шинэчилсэн хөтөлбөрийн дагуу хугацаат цэргүүд цэргийн мэдлэгийн зэрэгцээ англи хэл, компьютерын анхан шатны мэдлэг эзэмшиж, жолооны үнэмлэхтэй халагдах боломж бүрдсэн. Мөн арматурчин, өрлөгчин, мужаан, гагнуурчин, ойчин, машин механизмын оператор, жолооч зэрэг эрэлттэй мэргэжлээр сургалт авч, мэргэжлийн үнэмлэхтэй төгсөх боломжтой болсон нь нийгэмд шилжих бэлтгэлийг хангах алхам болж байна.

Түүнчлэн цэргийн мэргэжлийн зэргийн нэмэгдлийг 26 жилийн дараа шинэчилж, алба хаагчдын мэргэжлийн ур чадварыг үнэлэх, урамшуулах шинэ тогтолцоог бий болгосон. Шалгуур хангасан алба хаагчид нэгдүгээр зэрэгт 20 хувь, хоёрдугаар зэрэгт 15 хувь, гуравдугаар зэрэгт 10 хувь нэмэгдэл авах боломжтой болсон нь цэргийн албаны нэр хүнд, үр өгөөжийг улам нэмэгдүүлж байна.

Эх сурвалж: Батлан хамгаалах яам